Քեյթ Մոսի գոտկատեղին գտնվող դաջվածքը գնահատվել է 1,6 մլն դոլար: Այս մասին ասվում է Yahoo!-ի Shine հավելվածում: Պարբերականի հետ զրույցում 38-ամյա Քեյթը մասնավորապես պատմել է իր մարմնին առաջին դաջվածքի հայտնվելու պատմությունը: Նրա խոսքերով՝ դաջվածքը Լյուսյեն Ֆրեյդի հեղինակային գործն է:
Մոսը հայտնել է, որ վարպետի հետ ծանոթացել է 2002 թ.՝ այն բանից հետո, երբ իր հարցազրույցներից մեկում հայտնել էր, որ շատ կցանկանար հանդիպել Ֆրեյդի հետ: Իմանալով այդ մասին՝ նկարիչն ինքն է մոդելին հրավիրել իր տուն:
Զրույցի ժամանակ պարզվել է, որ նկարիչը դաջվածքներ անելու փորձ ունի: Նա Մոսին առաջարկել է որևէ կենդանու պատկերով դաջվածք անել, ինչին մոդելը պատասխանել է, որ թռչուններ է սիրում։ Նկարչի ունեցած էսքիզներից Մոսն ընտրել է երկու փոքրիկ թռչունների, որոնք շատ նման են ծիծեռնակների:
Ըստ Shine-ի՝ դատելով նրանից, որ Ֆրեյդի վրձնին պատկանող մերկ Մոսի նկարը (2002 թ.) վաճառվել է 3,93 մլն ֆունտ սթեռլինգով, ապա նրա կողմից արված դաջվածքի արժեքը 1,6 մլն դոլար է: Մոսն ինքը նշում է, որ իր մարմնի վրա կրում է արվեստի գլուխգործոց, որը տեսականորեն կարելի է վաճառել մի քանի միլիոն դոլարով:
Լյուսյեն Ֆրեյդը մահացել է 2011 թվականին:
