Այսօր՝ ժամը 19:30-ին, Արամ Խաչատրյան համերգասրահում տեղի կունենա արդեն չորրորդ անգամ անցկացվող Հայ կոմպոզիտորական արվեստի փառատոնի հանդիսավոր բացման արարողությունը:
Այս տարի փառատոնը կկոչվի «Չուխաջյան Ֆեստ» և նվիրված կլինի հայկական առաջին օպերայի հեղինակ Տիգրան Չուխաջյանի 175-ամյակին: Փառատոնը կնվիրվի նաև Հայաստանի կոմպոզիտորների և երաժշտագետների միության 80-ամյակին: Այս մասին «Առաջին լարատվական»-ին տեղեկացրին Հայաստանի պետական երիտասարդական նվագախմբի հասարակայնության հետ կապերի բաժնից:
Երեկոն կբացվի Հայաստանի կոմպոզիտորների և երաժշտագետների միության նախագահ և փառատոնի համահիմնադիր Ռոբերտ Ամիրխանյանի ողջույնի խոսքով:
Համերգի ընթացքում Ալ. Սպենդիարյանի անվան օպերայի և բալետի ազգային ակադեմիական թատրոնի սիմֆոնիկ նվագախմբի (երաժշտական ղեկավար և գլխավոր դիրիժոր, ՀՀ վաստակավոր արտիստ Կարեն Դուրգարյան) և երգչախմբի (գլխավոր խմբավար, ՀՀ վաստակավոր արտիստ Կարեն Սարգսյան) կատարմամբ կհնչեն հատվածներ Տ. Չուխաջյանի «Արշակ Երկրորդ» օպերայից և «Կարինե» օպերետից:
2010-ից Հայ կոմպոզիտորական արվեստի փառատոնն անցկացվում է ՀՀ մշակույթի նախարարության, Հայաստանի պետական երիտասարդական նվագախմբի (գեղարվեստական ղեկավար և գլխավոր դիրիժոր Սերգեյ Սմբատյան) և Հայաստանի կոմպոզիտորների և երաժշտագետների միության միացյալ ուժերով: Այս տարի փառատոնը անցկացվելու է նոյեմբեր-դեկտեմբեր ամիսներին, նախատեսվում է 8 համերգ:
Այսուհետ Հայաստանի պետական երիտասարդական նվագախմբի բոլոր համերգների յուրաքանչյուր գնված տոմսի հասույթի 10%-ը կնվիրաբերվի «Նվիրի´ր կյանք» բարեգործական հիմնադրամին, որն իր ամբողջ ներուժն ուղղում է քաղցկեղով և արյան հիվանդություններով տառապող հայ մանուկների կյանքի փրկությանը:
