Բրյուսելում մեկնարկած շոկոլադի շաբաթվա շրջանակում ստեղծվել է աշխարհի ամենաերկար շոկոլադե գնացքը: Մալթացի հրուշակագործ Էնդրյու Ֆարուջիայի 34-մետրանոց ստեղծագործությունը քաղաքի Հարավային կայարանում կանգնեցվելուց հետո մանրակրկիտ կերպով ուսումնասիրվել է Գինեսի ռեկորդների գրքի փորձագետների կողմից: Այս մասին հայտնում է ITAR-TASS-ը:
Քաղցր գնացքի առանձնահատկությունն այն է, որ նրա վագոններից ոչ մեկը չի կրկնվում` դրանցից յուրաքանչյուրը պատրաստված է տարբեր դարաշրջանների ոճով: Միջոցառման կազմակերպիչների խոսքով՝ հրուշակագործից 784 ժամ է պահանջվել ավելի քան 1 տոննա կշռող գնացքը պատրաստելու համար:
Վարպետը նաև շոկոլադից իրական չափերի դաշնամուր է ստեղծել, որի վրա կարելի է նվագել: Այն նույնպես գտնվում է Հարավային կայարանում: Ցուցանմուշները այնտեղ կմնան մինչև նոյեմբերի 25-ը, որից հետո կտեղափոխվեն Կակաոյի և շոկոլադի բրյուսելյան թանգարան:
Շոկոլադի շաբաթվան, որի ընթացքում նախատեսված են ցուցադրություններ, սեմինարներ ու համտես, մասնակցում են 20 ռեստորաններ, 32 ընկերություններ` մասնագիտացած շոկոլադի արտադրության մեջ, և Բրյուսելի ավելի քան 250 խանութներ:
Բելգիայում շոկոլադի արտադրությունը սկսվել է 1912 թվականից: Այսօր բելգիական շոկոլադը մեծ ճանաչում է վայելում աշխարհում: Այնտեղ է կենտրոնացած Եվրոպայում սպառվող շոկոլադի արտադրության 48 տոկոսը: Միջոցառման կազմակերպիչների խոսքով՝ Բելգիայի յուրաքանչյուր բնակիչ տարեկան առնվազն 9 կգ շոկոլադ է ուտում:
