Գյումրու «Շիրակ»-ի դարպասապահ Արթուր Հարությունյանն ակումբի պաշտոնական կայքի հետ զրույցում խոսեց «Արարատի» դեմ բարդ հանդիպման, ինչպես նաեւ «Փյունիկ»-ի դեմ գալիք խաղի մասին:
– Ճիշտ է երեք միավոր մենք վաստակեցինք, բայց այդ հանդիպմանը մենք չցուցադրեցինք մեր լավ կողմերը: Սա բարդ հանդիպում էր, որը կարող էր և հակառակ արդյունքն ունենար, ուղղակի մենք կարողացանք գոլ խփել և հաղթանակով ավարտել հանդիպումը: «Արարատ»-ն այժմ նոր մարզիչի հետ շատ լավ է հանդես գալիս, և ցանկացած թիմի համար բարդ մրցակից է:
– Առաջնության ընթացքում եղե՞լ է, որ դու մի քանի հանդիպում անընդմեջ «չոր» ես պահել սեփական դարպասը: Վերջին երկու դժվար հանդիպումներում նույնպես գոլ բաց չթողեցիր: Ի՞նչ կասես այդ կապակցությամբ:
– Կասեմ, որ դա ամբողջ թիմի շնորհիվ է, հատկապես պաշտպանության գիծն է շատ օգնում: Ամեն մեկը դաշտում իր գործն է անում: Իմ գործն էլ դաշտում գոլ բաց չթողնելն է: Առաջնության ընթացքում մենք շատ գոլել էինք բաց թողել, որն անձամբ ինձ համար շատ ծանր է, և նույնիսկ մեր գլխավոր մարիզչի համար: Ես ջանք չեմ խնայում, որպեսզի արդարացնեմ բոլորի սպասելիքները: Եվ կարծում եմ, ամեն ինչ լավ է ստացվում:
– Երկու օրից հանդիպում եք անցկացնելու Փյունիկի հետ: Ինչպիսի՞ մրցակից է «Փյունիկ»-ը:
– Այսօրվա դրությամբ բոլոր հանդիպումները մեզ համար կարևոր են: Մենք այս հանդիպմանն էլ աշխատելու ենք երեք միավոր վաստակել: Ինչ վերաբերվում է «Փյունիկ»-ին, ապա դա մի թիմ է, որի հետ պետք է հաշվի նստել: Այժմ թիմը ժամանակավորապես գլխավորել է մի մարզիչ, որը մեծ ներդրում ունի այդ թիմում և որը գլխավորում է մեր ազգային հավաքականը: Ամեն ինչ պետք է անենք, որ առավելագույնին հասնենք:
– Առաջին հորիզոնականը պարտավորեցնո՞ղ է:
– Առաջնության ընթացքում ձգտում ես հասնել առաջին հորիզոնկանին, հետո, երբ արդեն հասնում ես դրան ձգտում ես, որ պահպանել այն: Ասեմ, որ ավելի դժվար է պահպանելը, քան հասնելը: Երբ հասնում ես առաջին հորիզոնականին այդ ժամանակ շատ ավելի կորցնելու բան ունես: Նույնիսկ մեր գլխավոր մարզիչն, զրուցելով մեզ հետ, ասում է, որ պետք չէ անըհդահատ մտածել առաջին հորիզոնականի մասին, մենք պետք է դաշտ դուրս գանք և մեր ֆուտբոլը խաղանք, որը և ցուցուդրել ենք մինչ առաջին հորիզոնական հասնելը: Մնացածն արդեն պարզ կլինի առաջնության ավարտին:
