Իսրայելի նախագահ Շիմոն Պերեսը երկուշաբթի օրը հանդիպել է Մերձավոր Արևելքում միջազգային քառյակի պատվիրակ Թոնի Բլեերի հետ, և նրանք քննարկել են Իսրայելի հարավում և Գազայի հատվածում տեղի ունեցող իրադարձությունները։ Այս մասին հաղորդում են միջազգային ԶԼՄ-ները:
Մեծ Բրիտանիան Իսրայելին կոչ է անում անել ամեն ինչ Գազայի հատվածում հակամարտությունը դադարեցնելու համար և, զոհերի թվի աճի հետ կապված, իր մտավախությունն է հայտնում։
Մեծ Բրիտանիայի ԱԳՆ ղեկավար Ուիլյամ Հեյգը հայտարարել է, որ լարվածության թեժացման պատասխանատվությունը «Համաս»–ի վրա է։ Միաժամանակ նա պնդում է, որ երկու կողմերը պետք է քայլեր ձեռնարկեն արյունահեղությունը դադարեցնելու համար: Կիրակի օրը Հեյգը հայտարարել էր, որ հակամարտության կարգավորման միջնորդի հիմնական դերն իր վրա պետք է վերցնի ԱՄՆ-ը:
Մոտ օրերս Պերեսը հանդիպումներ կունենա ՄԱԿ–ի գլխավոր քարտուղարի և Գերմանիայի ԱԳ նախարարի հետ, ովքեր հերթով կժամանեն տարածաշրջան:
