ԱԺ ՀՅԴ խմբակցության քարտուղար Աղվան Վարդանյանը ԱԺ արտահերթ նիստում «Կուտակային կենսաթոշակների մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ Աշխատանքի և սոցիալական հարցերի նախարար Արտեմ Ասատրյանից հետաքրքրվեց՝ վերջին անգամ պետական հատվածում երբ են աշխատավարձեր բարձրացվել, համակարգի արդյունավետության համար քանի մարդ պիտի դրանում ընդգրկված լինի:
«Ի՞նչ թիվ պիտի լինի, որ արդարացված լինի: Եթե աշխատավարձերը էլի բարձրացնենք, հնարավո՞ր է մի նոր՝ ավելի նպատակային սոցիալական վճար մտցնենք և դա փոխանցենք ոչ թե կամուրջ, այլ թունել հաշվին: Որտե՞ղ է այն քննարկվել, կառավարությունը հայտարարեց, թե՝ քննարկելու ենք հանրության հետ, քաղաքական ուժերի հետ, էնպես ենք անելու, որ ընդունելի լինի: Ի՞նչ եք արել էդ ուղղությամբ, արդյոք չե՞ք խախտել այդ պահանջը»,- հետաքրքրվեց նա:
Վարդանյանը նշեց, թե մասնավոր հատվածի աշխատողը պիտի դիմում գրի իր գործատուին՝ հարգելի պարոն գործատու, ես հրաժարվում եմ կուտակային պահում անելուց: «Մենք այս դահլիճում ունենք տասնյակ պատգամավորներ, ովքեր գործատուներ չեն, սեփականատերեր են, կարծում եք՝ քանի՞ հոգի դիմում գրած կլինեն»,- հարցրեց նա:
Նախարարը պատասխանեց, թե 2003 թվականին է աշխատավարձ բարձրացվել, ինչ վերաբերում է քննարկումներին, ապա դրանք տեղի են ունեցել: Նախարարի խոսքով՝ այն մոտեցումները, որ կային, հիմք են տվել այս նախաձեռնությունը ներկայացնելու և վստահ լինելու, որ համակարգը հնարավոր է լինելու արդյունավետ գործարկել և ապահովել ան նպատակների իրագործումը, ինչ նախատեսված է:
Ասատրյանը վստահ է՝ կառավարությունը որևէ քայլ չի արել, որի համար վատ զգա կամ խնդիր տեսնի, որ մի բան ասել է մեկ այլ բան արել, եղել է այն, ինչ-որ ներկայացվել է: