ՀՀՇ վարչության փոխնախագահ Սամվել Աբրահամյանը, անդրադառնալով երեկվա հանրահավաքին, «Առաջին լրատվական»-ի հետ զրույցում առանձնացրեց 3 կարևոր փաստ։ «Նախ և առաջ` հասարկական ֆորումը, որի մասին նախորդ հանրահավաքում հայտարարեց նախագահ Լևոն Տեր-Պետրոսյանն է, այլևս կայացած է։ Հասարակական ֆորումն իր առաջին որոշումը երեկ կայացրեց ու իրականացրեց։ Դա նշանակում է, որ հասարակությունն իսկապես լուրջ գործոն դարձավ բոլոր քաղաքական գործընթացներում. ֆորումը գոնե 2 արդյունք գրանցեց` վերանվաճեց Ազատության հրապարակը և լուծեց երկու քաղբանտարկյալի ազատ արձակման հարց։
Երկրորդ արդյունքը. կարելի է փաստել, որ Հայաստանում այլևս հնարավոր չեն ուժային լուծումներ։ Այսինքն` հասարակական ֆորումը լուծեց նաև դրա խնդիրը։ Իհարկե,այստեղ իշխանությունները նույնպես ընդառաջ գնացին, բայց կարևորը, որ հասարակությունը պարտադրեց իր խաղաղ կամքը` ստիպելով իշխանություններին հրաժարվել ուժային լուծումներից։
Եվ վերջապես` երրորդ արդյունքը եղավ այն, որ Հայաստանը, հայ ժողովուրդը, ինչպես 88-ին, այնպես էլ այսօր, ի վիճակի է իր խնդիրները լուծել անարյուն ճանապարհով` առանց բախումների։
Եվ թավշյա հեղափոխությունը Հայաստանում անխուսափելի է»,- ասաց պարոն Աբրահամյանը։