Իրանական IRNA լրատվական գործակալության փոխանցմամբ՝ Իրանը Ուրմիա լճի չորացումը կանխելու նպատակով Արաքս գետի ջրերի օգտագործման հարցը քննարկում է ադրբեջանական կողմի հետ և միայն դրանից հետո է սկսելու իրականացնել տվյալ նախագիծը: Այս մասին հայտարարել է Իրանի էներգետիկայի նախարարության՝ անդրսահմանային գետերի պաշարների օգտագործման գլխավոր վարչության տնօրեն Ջաբբար Վեթնֆյադան:
Վերջինս հույս է հայտնել, որ Ադրբեջանը համաձայնություն կտա Արաքս գետի ջրերն Ուրմիա լիճ փոխադրելու նախագծի իրագործմանը: Պաշտոնական տվյալներով՝ Ուրմիա լիճը չորացել է 70 տոկոսով: Ներկայումս լճի մեկ լիտր ջուրը պարունակում է մինչև 400 գրամ աղ, մինչդեռ նախկինում այդ ցուցանիշը կազմել է 160-170 գրամ աղ:
2010 թվականին Թավրիզ կատարած այցի ժամանակ Իրանի նախագահ Մահմուդ Ահմադինեժադը հաստատեց Արաքս գետի ջրերից 600 միլիոն խորանարդ մետր ջուր դեպի Ուրմիա լիճ փոխադրել ենթադրող նախագիծը, որը գնահատվում է 1.2 միլիարդ դոլար: 2011 թվականի սեպտեմբերին Իրանի կառավարությունն այդ նպատակով հատկացրել է 900 միլիոն դոլար: ՄԱԿ-ի զարգացման ծրագիրն իր հերթին նույն նպատակով հատկացրել է 135 միլիոն դոլար:
