Փոխարտգործնախարար Շավարշ Քոչարյանը լրագրողների հետ ճեպազրույցում անդրադառնալով հարցին, թե երբ է Հայաստանը ստորագրելու Եվրասիական միությանն անդամակցելու պայմանագիրը, ասել է, թե կա ԵՏՄ Բարձրագույն խորհրդի որոշում, որ անդամակցության պայմանագիրը ստորագրման պետք է պատրաստել մինչև հուլիսի 1-ը: Քոչարյանն այդպես էլ հստակ օր չի ասել, ի պատասխան լրագրողների հարցի:
Զարմանալի չէ, որովհետև Շավարշ Քոչարյանն ի՞նչ իմանա կամ որտեղի՞ց իմանա, թե երբ է Հայաստանը ստորագրելու Եվրասիական միությանն անդամակցելու պայմանագիրը, կամ ստորագրելո՞ւ է արդյոք: Եվ սա անհայտ է ոչ միայն Շավարշ Քոչարյանի, այլև Հայաստանի իշխանությունների համար ընդհանրապես:
Խնդիրն այն է, որ Հայաստանի ստորագրության հարցը գտնվում է Պուտինի իրավասության ներքո, և երբ որ ՌԴ նախագահը կասի կամ կհամարի, որ Հայաստանը պետք է անդամակցի ԵՏՄ-ին կամ կարող է անդամակցել, այն ժամանակ էլ կապահովի Հայաստանի ստորագրության արարողությունը: Այնպես որ, Շավարշ Քոչարյանին կամ Հայաստանի որևէ այլ պաշտոնյայի այս մասին հարցնելը միանգամայն ավելորդ է՝ նրանք ոչ թե գաղտնի են պահում ինչ-որ բան, այլ պարզապես ոչ մի բան չգիտեն այդ մասին: Իսկ ՌԴ նախագահ Պուտինի որոշումն էլ կախված է, բնականաբար, ոչ Հայաստանից, այլ Ղազախստանից, Ադրբեջանից, Թուրքիայից, բոլորից` բացի Հայաստանից:
Սերգեյ Լավրովը երեկ սկսել է իր այցը Բաքու, և չի բացառվում, օրինակ, որ հենց Բաքվում կարող է պարզ լինել Հայաստանի ստորագրության հարցը: Հայաստանը մնացել է խաղից դուրս, և պետք է շեշտել, որ մնացել է Հայաստանի իշխանությունների կամքով: Եվ սա, ըստ էության, ինչ-որ առումով էլ նշանակում է, որ իրականում Հայաստանը Եվրասիական միության անդամ է, քանի որ այդ անդամությունը հենց նշանակում է Հայաստանի խաղից դուրսբերում:
Պարզապես Հայաստանի անդամությունը ֆորմալ չէ, և Հայաստանի ստորագրությունը, այսպես ասած, աճուրդի է հանված: Մոսկվան այդ ստորագրությունը հանել է աճուրդի, և ով ավելի թանկ կգնահատի ստորագրությունը, նրան էլ այն կվաճառվի: Իսկ ահա Հայաստանը նույնիսկ սեփական ստորագրությունը աճուրդով գնելու հնարավորությունից և իրավունքից է զրկված: Հայաստանը կգնի այն, ինչ Ռուսաստանը կասի:
Իսկ Ռուսաստանը հիմա ասում է, որ Հայաստանը գնի իրենից թանկ էլեկտրաէներգիա: Եվ Հայաստանում թանկանում է էլեկտրաէներգիան, որը արտադրում են ռուսական պետական ընկերությունները՝ տնօրինելով Հայաստանի էներգետիկան: Սեպտեմբերի 3-ից հետո ռուսները նախ մեզ թանկ գազ վաճառեցին՝ իրանական էժանից ստիպելով հրաժարվել, հիմա թանկ էլեկտրաէներգիա են վաճառում:
Մնում է սպասել, թե ինչ կվաճառեն հաջորդը: Տեսականում չի բացառվում իհարկե, որ դա լինի ԵՏՄ-ին անդամակցելու Հայաստանի ստորագրությունը: