Եգիպտոսի կառավարությունը որոշել է 5000-ական ֆունտ (մոտ 900 դոլար) վճարել Ասյութ նահանգում տեղի ունեցած ողբերգության յուրաքանչյուր զոհի ընտանիքին, հայտարարել է Եգիպտոսի սոցիալական ապահովագրության նախարար Նագի Հալիլը, հայտնում է RIA Novosti-ն:
Շաբաթ օրն առավոտյան Ասյութ-Կահիրե գնացքը բախվել էր ավտոբուսին, որում ավելի քան 60 դպրոցական է եղել, նրանցից շատերը 6 տարեկանից փոքր են եղել: Վերջին տվյալներով` ողբերգության հետևանքով 50 մարդ է զոհվել, հիմնականում` երեխաներ, մոտ 20 ուղևոր ծանր վնասվածքներ է ստացել:
Ասյութ նահանգում տեղի ունեցած աղետի հետ կապված հրաժարական է տվել Եգիպտոսի տրանսպորտի նախարար Մուհամմեդ Ռաշիդ Ալ-Մատինին: Աշխատանքից հեռացվել է Եգիպտոսի երկաթուղային կազմակերպության ղեկավարը, նրա նկատմամբ քրեական հետաքննություն է սկսվել:
Ըստ տեղեկության` երկաթուղային անցուղու վրա, որով անցել է երեխաների ավտոբուսը, բացված է եղել ուղեփակոցը: Սակայն տրանսպորտի նախարարության հատուկ հայտարարության մեջ նշված է, որ դեպքի պահին ուղեփակոցն իջեցված է եղել, իսկ ճանապարհը հսկել են երկաթուղու ծառայողներն ու տրանսպորտային ոստիկանությունը:
Եգիպտոսի նախագահ Մուհամմեդ Մուրսին ցավակցություն է հայտնել զոհվածների ընտանիքներին և մոտ ժամանակներս Ասյութում տեղի ունեցածի կապակցությամբ հատուկ ուղերձով հեռուստաուղերձով կդիմի եգիպտացիներին:
