«Դեմ եմ» շարժման ակտիվիստներն այսօր մասնակցեցին «հրաշալի քառյակի» նիստին՝ քննարկելու պարտադիր կուտակային կենսաթոշակային համակարգի վերաբերյալ կառավարության ներկայացրած նոր աշխատանքային փաստաթուղթը:
Շարժման ակտիվիստները նիստից հետո լրագրողներին ասացին, որ իրենք հաստատակամ են՝ պարտադիր բաղադրիչը չպետք է առհասարակ գործի՝ տարիքային և ոչ մի խմբի համար: Բացի այդ, ՍԴ-ում շարժման շահերը ներկայացնող իրավաբան Մերի Խաչատրյանն ասաց, որ իրենք իրենց ձեռքի տակ ունեն աղաղակող ձայնագրություններ, թե ինչպես են տարբեր հիմնարկների աշխատակիցներ դժգոհում, որ իրենցից պահումներ են կատարում:
Շարժման անդամ Արսեն Մանուկյանն ասաց, որ եթե իրենց պահանջները չբավարարեն, ապա իրենք օրենքի շրջանակներում կդիմեն ցանկացած քայլի և թույլ չեն տա, որ այս տեսքով օրենքի նոր նախագիծ ընդունվի:
Նրանց խոսքերով՝ եթե կառավարության առաջարկն այս տեսքով դառնա օրենք, ապա Սահմանադրական դատարանում այն պատրաստ են երկրորդ անգամ վիճարկել: Վստահ են՝ այս տարբերակը ևս հակասահմանադրական է: