Հորդանանում բախում է տեղի ունեցել վառելիքի գների աճի դեմ բողոքի ակցիայի մասնակիցների և ոստիկանության միջև, ինչի հետևանքով մեկ ցուցարար զոհվել է ստացած հրազենային վնասվածքից: Այս մասին հայտնում է Al-Jazeera հեռուստաալիքը:
Դեպքը տեղի է ունեցել անցած գիշեր` Թագավորության հյուսիսային Իրբիդ նահանգում: Ոստիկանության տվյալներով՝ զանգվածային բողոքի ակցիայի ժամանակ ցուցարարները հարձակվել են ոստիկանական բաժանմունքի վրա: Իրավապահ մարմինները ստիպված են եղել հրազեն կիրառել: Բախումների հետևանքով մոտավորապես 10 մարդ է վիրավորվել, այդ թվում` ոստիկաններ: Մի քանի տուժածներ ծանր վիճակում գտնվում են հիվանդանոցում:
Հորդանանում արդեն երրորդ օրն է՝ շարունակվում են ժողովրդական հուզումները, որոնց պատճառ է դարձել վառելիքի սուբսիդիաների կասեցման մասին կառավարության որոշումը: Այդ քայլով իշխանությունները հույս ունեն վերացնել 2012-ի բյուջեի դեֆիցիտը, որը կազմում է 5 մլրդ դոլար:
Ցույցերին ակտիվ քաղաքական մասնակցություն ցուցաբերող իսլամական քաղաքական ուժերի ներկայացուցիչները կառավարության այդ որոշումն անվանել են «սադրանք ժողովրդի նկատմամբ»: Ակցիայի մասնակիցները պահանջում են վարչապետի և կառավարության հրաժարականը: