ՄԱԿ-ի Անվտանգության խորհուրդը պետք է Իսրայելին «ուղիղ և կոշտ ազգանշան» ուղղի, որպեսզի վերջ դնի Գազայի հատվածում նրա կողմից դրսևորվող ագրեսիային: Նման կոչով է ԱԽ անդամներին դիմել համաշխարհային կազմակերպությունում Պաղեստինի մշտական դիտորդ Ռիադ Մանսուրը: Այս մասին գրում է ITAR-TASS-ը:
«Անվտանգության խորհուրդը պետք է կատարի իր պարտականությունները ՄԱԿ-ի Կանոնադրության շրջանակում և ձեռնարկի հրատապ գործողություններ, որպեսզի վերջ դնի Գազայի հատվածում և օկուպացված մնացած տարածքներում, այդ թվում՝ Արևելյան Երուսաղեմում, մեր ժողովրդի դեմ իսրայելական ագրեսիային»,- նշվում է ՄԱԿ-ի կենտրոնակայանի տարածած հայտարարությունում:
Մանսուրի խոսքերով՝ «գործողություններ կատարելու անկարողությունը, ինչպես դա եղել է անցյալում, միայն ամրապնդում է Իսրայելի անպատժելիության զգացումը և կարող է նրան անձնատուր դարձնել բռնության նոր ալիք բարձրացնելու ցինիկ և չարակամ փորձերին, ինչը անմեղ կյանքեր կխլի և կհանգեցնի իրադրության հետագա ապակայունացման»:
Անվտանգության խորհուրդը ներկայումս Գազայի հատվածում տիրող իրադրության վերաբերյալ դռնփակ հանդիպում է անցկացնում՝ հրավիրված ՄԱԿ-ում արաբական մի խումբ երկրների դեսպանների հայցով:
