Զահրա Ալ-Բուգայշին հայտնաբերվել է Կահիրեի կենտրոնում գտնվող իր բնակարանում՝ առանց կենդանության նշանների: Նրա մարմնի վրա եղել է դանակի առնվազն տասը հարված: Ինչպես ենթադրում է ոստիկանությունը, խոսքը «ընտանիքի պատվի պաշտպանության» մասին է:
Աղջկա քույրը պատմել է, որ հինգ օր նա զանգերին չի պատասխանել: Դուռը փակ է եղել, և ստիպված հարևաններին են կանչել այն ջարդելու համար: Մտնելով ներս՝ Զահրային հայտնաբերել են իր ննջարանի մահճակալին մահացած:
Մուամար Քադաֆիի ռեժիմի տապալումից առաջ Ալ-Բուգայշին ծառայում էր բռնակալի հայտնի կին-թիկնապահների ստորաբաժանման մեջ: Ռեժիմի տապալումից հետո նա փախել էր Եգիպտոս՝ իրականացնելու դերասանուհի դառնալու իր երազանքը:
Ոստիկանությունը չի հավատում սպանության քաղաքական դրդապատճառներին: Քննիչների հիմնական վարկածն այն է, որ նրան եղբայրն է սպանել, որից անմիջապես հետո փախել է Լիբիա: Ինչպես ենթադրվում է, նա չի կարողացել այլ միջոց գտնել Զահրային հետ պահելու մի մասնագիտությունից, որը Լիբիայում ամոթալի է համարվում:
