Լոնդոնի «Հիթրոու» և «Գաթվիկ» օդանավակայնները ԵՄ երկրներում տեղի ունեցող զանգվածային գործադուլների պատճառով տասնյակ չվերթներ են հետաձգել:
«Հիթրոուն» այս պահին հետաձգել է 40 չվերթ՝ հիմնականում դեպի Իսպանիա և Պորտուգալիա, որտեղ այժմ զանգվածային ցույցեր են ընթանում՝ սոցիալական վճարների կրճատման և հարկերի բարձրացման դեմ: Եվրոպայում գործադուլներն ազդել են նաև «Գաթվիկի» աշխատանքի վրա:
Հիշեցնենք, որ Պորտուգալիայում և Իսպանիայում զանգվածային ցույցեր են տեղի ունեում «Ցույցերի օրվա» շրջանակներում:
Իտալիայի և Հունաստանի արհմիությունները նույնպես կոչ են արել բողոքի ակցիաներ կազմակերպել, ցույցեր կանցկացվեն նաև Ֆրանսիայում, Գերմանիայում և Լեհաստանում:
Իտալիայի 80 քաղաքներում հայտարարվել է համընդհանուր գործադուլ՝ կառավարության ձեռնարկած տնտեսական կոշտ միջոցառումների դեմ: Բացի արհմիությունների ներկայացուցիչներից և աշխատողներից, ցույցերին մասնակցում են նաև ուսանողներն ու սովորողները, որոնք դժգոհ են կրթության ոլորտում իրականացվող քաղաքականությունից:
Ինչպես տեղեկացնում են տեղական ԶԼՄ-ները, որոշ քաղաքներում բախումներ են տեղի ունեցել ոստիկանության և ցուցարարների միջև: Օրինակ՝ Թուրինում ցուցարարները գրավել են տեղական իշխանության վարչական շենքը, մեկ ոստիկան տուժել է:
