ԱԺ ՀՀԿ խմբակցության պատգամավոր Կորյուն Նահապետյանի կարծիքով՝ սահմանային վերջին միջադեպերը միայն մեր Զինված ուժերի զգոնությունը ստուգելու նպատակ չէ, որ ունեն: «Առաջին լրատվական»-ի հետ զրույցում Նահապետյանը նշեց, որ եթե այդ միջադեպը համադրեն մեր տարածաշրջանում տեղի ունեցող զարգացումների, նաև աշխարհաքաղաքական, ինտեգրացիոն տարբեր գործընթացների հետ, դրանց ՀՀ մասնակցության հետ, ապա կարելի է ենթադրել, որ, այնուամենայնիվ, սրանք ոչ միայն մեր զգոնությունը ստուգելու նպատակ էին հետապնդում, այլև յուրաքանչյուր անգամ, երբ լուրջ իրադարձություններ են տեղի ունենում, հակառակորդն ավելի ակտիվ է դառնում. նա փորձում է ցույց տալ, որ ինքը նույնպես այս տարածաշրջանում ունի առանցքային դերակատարում:
«Մեզ խորապես մտահոգում է վերջին սահմանային միջադեպը: Այդ ուղղությամբ առաջին անգամ է, որ նման միջադեպ է տեղի ունենում, երբ մենք ունենում ենք նաև մարդկային զոհեր: Իհարկե, նախկինում նույնպես եղել են կրակոցներ, բայց այսպիսի միջադեպ ես չեմ հիշում վերջին տարիներին: Բնականաբար, մեր գործողությունները պետք է լինեն համարժեք: ՊՆ-ն տարածել է հաղորդագրություն, իրավիճակը վերահսկելի է: Կա որոշակի լարվածություն, դա պետք է ընդունենք, բայց մյուս կողմից, կարծում եմ` մեր զինված ուժերը պետք է պատրաստ լինեն նման գործողությունների»,- ասաց նա` հավելելով, որ սկզբունքորեն չի բացառում նաև սահմանային տարբեր հատվածներում լինեն դիվերսիոն գործողություններ:
Նահապետյանի խոսքով` ՀՀ զինված ուժերը մշտապես պետք է պատրաստ լինեն, միշտ պետք է զգոնությունը պահեն: Պատգամավորը նշեց` իրավիճակն այնպիսին է, որ հաստատված չէ խաղաղություն, և բոլոր դեպքերում պետք է միշտ զգոն լինել, հակառակորդը պետք է միշտ զգա մեր ուժը, մեր ԶՈւ մարտունակությունը:
«Քաղաքական առումով պետք է նկատեմ, որ Ադրբեջանը ցույց է տալիս իր անպատրաստակամությունը` խաղաղ ճանապարհով լուծելու իր խնդիրները: Խորհրդարանական տարբեր հարթակներում մենք այդ մասին բարձրաձայնել ենք, նա չի հեռացնում դիպուկահարներին սահմանային հատվածից, շարունակում է դիվերսիոն գործողություններ կատարել` ինչպես ԼՂ սահմանային հատվածում, այնպես էլ ՀՀ տարածքի տարբեր հատվածներում: Առաջիկայում մենք` խորհրդարանականներս, տարբեր հարթակներում ներկայացնելու ենք մեր հստակ դիրքորոշումը, բարձրաձայնելու ենք, ահազանգելու ենք մեր մտահոգությունների մասին»,- ասաց նա:
Նահապետյանը տեղեկացրեց, որ շատ մոտ ժամանակահատվածում հնարավոր է իրենք մասնակցեն ՆԱՏՕ-ի խորհրդարանական վեհաժողովի «Ոոզ Ռոթ» սեմինարին, որը տեղի է ունենալու Բաքվում` հունիսի 16-18-ը: «Որպես պատվիրակության ղեկավար` կարող եմ նշել, որ մենք անպայմանորեն անդրադառնալու ենք նաև վերջին այս միջադեպերին, որ տեղի ունեցան մեր սահմանային հատվածում»,- ասաց նա: