Femen շարժման երկու ակտիվիստուհիներ, որոնք մարտի 30-ին Ստամբուլում ՏԻՄ ընտրությունների ժամանակ սկանդալային ակցիա էին կազմակերպել, կարող են 3-ական տարվա ազատազրկման դատապարտվել: Այսպիսի պատիժ, ինչպես հաղորդում է Doğan գործակալությունը, ընտրել է դատախազությունը, որը կանանց մեղավոր է համարում հանրային վիրավորանքի և ընտրություններին խոչընդոտելու համար:
Այս մեղադրանքների դեպքում պատիժը կարող է տատանվել 1-3 տարի ժամկետում: Մեղադրյալի աթոռին են 2 ֆրանսուհիներ՝ 24 տարեկան Սոլյեն Աննի Ասսուանը և 26 տարեկան Էլվիր Դյուվելլ Շառլը:
Պաշտպանությունը խոստովանում է, որ ակցիան ծրագրված է եղել, բայց, ըստ փաստաբանների, նպատակը եղել է Թուրքիայում խոսքի ազատության սահմանափակումների դեմ արտահայտվելը, ոչ թե ընտրություններին խոչընդոտելը:
Մարտի 30-ին աղջիկները, ընտրող ձևանալով, մտել են Ստամբուլի Ուսկյուդար շրջանի ընտրատեղամաս, մոտեցել են սեղաններին, որտեղ նստած են եղել ընտրական հանձնաժողովի անդամները, ցատկել են սեղանների վրա և հանել շապիկները: Աղջիկները չլրացված քվեաթերթիկները նետել են այս ու այն կողմ: Նրանց կրծքերի վրա գրված է եղել՝ «Արգելել Էրդողանին»:
