Թուրքական Zaman թերթի փոխանցմամբ, Ռուսաստանը կարող է հրաժարվել «Հարավային հոսք» գազատարից, որը հանդիսանալու է միջինասիական և կասպյան գազը Եվրոպա հասցնելուն միտված «Նաբուկո» գազատարի այլընտրանքային տարբերակը:
Նշվում է, որ «Հարավային հոսք» գազատարի իրագործումը եղել է Թուրքիայի վարչապետ Էրդողանի և Ռուսաստանի նախագահ Մեդվեդևի միջև կայացած բանակցությունների հիմնական թեմաներից մեկը.
«Ռուսաստանի փոխվարչապետ Իգոր Սեչինի խոսքերով, Մոսկվան այժմ մտածում է այդ նախագծից հրաժարվելու ուղղությամբ և զբաղված է այլընտրանքային տարբերակների փնտրտուքով: Մասնավորապես, Ռուսաստանն այժմ կարող է սեփական գազը Եվրոպա հասցնել հեղուկացված վիճակում: Այդ նպատակով հատուկ գազային տերմինալ կկառուցվի Սև ծովի ափին, ուր ռուսական գազը կհեղուկացվի և հատուկ լցանավերով կառաքվի դեպի Եվրոպա:
«Հարավային հոսք» գազատարից Ռուսաստանի երես թեքելու հիմնական պատճառն այն է, որ դրա կառուցման հետ կապված նախնական ֆինանսական հաշվարկները սխալ դուրս եկան, և այժմ տարեկան 63 միլիարդ խորանարդ մետր թողունակություն ունենալիք այդ գազատարի նախագիծը գնահատվում է 15.5 միլիարդ դոլար»:
Հիշեցնենք, որ «Հարավային հոսք» գազատարի` թուրքական ջրային հատվածով անցնելու պայմանավորվածությունը ձեռք է բերվել 2009 թվականի ամռանը, երբ Ռուսաստանի վարչապետ Վլադիմիր Պուտինն այցելեց Թուրքիա: Ներկայումս ռուսական լրատվամիջոցները «Հարավային հոսք» գազատարի հնարավոր տապալման հարցում մեղադրում են Թուրքիային` նշելով, որ վերջինս, տալով սեփական ջրային տարածքով գազատարի անցնելու թույլտվությունը, միևնույն ժամանակ դեռևս չի ներկայացրել համապատասխան անհրաժեշտ փաստաթղթերը:
Սակայն պետք է նկատել, որ «Հարավային հոսք» գազատարի տապալման դեպքում Թուրքիան կզրկվի հավելյալ տարանցիկ գումարներից, չի ավելանա Թուրքիայից ԵՄ-ի ունեցած ` առանց այն էլ տարանցիկ մեծ կախվածությունը, և վերջապես, եթե «Հարավային հոսք» գազատարին փոխարինի գազի հեղուկացման տարբերակը, ապա դա կնշանակի, որ այն փոխադրող լցանավերը պետք է անցնեն սևծովյան նեղուցներով` էլ ավելի մեծացնելով դրանց ծանրաբեռնվածությունը:
Չպետք է մոռանալ, որ 1990-ական թվականներից սկսած` Թուրքիան լրջորեն սահմանափակումներ է մտցնում սևծովյան նեղուցներով հեղուկանավերի անցման հարցում, ինչն էլ այն ժամանակ հիմք դրեց ռուս-թուրքական «նեղուցային հակամարտությանը» և միլիարդավոր դոլարների վնաս պատճառեց Ռուսաստանին (սեփական էներգակիրներն այլ երկրներով անցնող խողովակաշարերով առաքելը շատ թանկ հաճույք է):
