ԼՂՀ-ի կարգավորման գործընթացում ՌԴ-ն ցանկանում է միջնորդի դեր ստանձնել: Ինչպես գիտենք, ՌԴ-ն ԵԱՀԿ Մինսկի խմբի համանախագահ երկիր է, ուստի կողմ է, որպեսզի ԼՂ-ում հարցը կարգավորվի խաղաղ ճանապարհով` առանց զինված գործողությունների: Սա է պատճառը, որ ՌԴ-ն դեմ է, որպեսզի ԼՂ-ի ստատուսը որևէ կերպ փոխվի: Իսկ միջազգային պրոյեկտների գործարկումն այնտեղ, բնականաբար, կուղղորդի իրավիճակն այլ ուղղությամբ: Այս մասին այսօր «Առաջին լրատվական»-ի հետ զրույցում ասաց Գերմանառուսական ֆորումի գիտական տնօրեն, միջազգային փորձագետ Ալեքսանդր Ռառը՝ անդրադառնալով Ստեփանակերտում օդանավակայանի շահագործման խնդրին:
Ըստ փորձագետի՝ ՌԴ-ն այսօր կողմ չէ բարդ իրավիճակների, դա է պատճառը, որ հակամարտող կողմերի գործողություններում պահպանում է չեզոքություն: «ՌԴ-ն կողմ է ներկայիս ստատուս քվոյին և բանակցությունների շարունակմանը»,- հստակեցրեց Ալեքսանդր Ռառը:
Մասնավորապես, խոսելով Ստեփանակերտում շահագործվելիք օդանավակայանից՝ նա կարծիք հայտնեց, որ այն չի կարող լինել միջազգային օդանավակայան, քանի որ այդտեղ միջազգային թռիչքներ չեն իրականացվի:
«Այդ պատճառով հիմք չեմ տեսնում` ասելու, թե այդ օդանավակայանը գործող է լինելու: Չեմ էլ կարծում, որ այսքան շուտ կարելի է այս հարցը լուծել՝ նույնիսկ ի նպաստ ԼՂ ժողովրդի: Միջոցներ տրամադրվում են օդանավակայանի շահագործման համար, բայց չեմ կարծում, թե հնարավոր է այդ օդանավակայանը բացել: Քաղաքական պատճառներով այսօր դա բավականին դժվար է իրականացնել, որովհետև ԼՂ ստատուսի հարցը դեռևս լուծված չէ, և թռիչքներ այնտեղ և այնտեղից դժվար է պատկերացնել»,- մեկնաբանեց միջազգային փորձագետը: Նա պարզաբանեց` եթե ԼՂ կարգավորման շուրջ քաղաքական փոփոխություններ լինեն, օդանավակայանը միգուցե գործի:
Հիշեցնենք, որ Ադրբեջանում Ռուսաստանի դեսպան Վլադիմիր Դորոխինն ադրբեջանական լրատվամիջոցներին տված հարցազրույցի ժամանակ անդրադարձել էր Ստեփանակերտի օդանավակայանի շահագործմանը: Նա նշել էր, որ ռուսական կողմը, հակամարտության կարգավորման մյուս միջնորդների հետ միասին, արդեն իսկ իր մտահոգությունն է հայտնել այդ կապակցությամբ:
«Մենք նախկինի նման կարծում ենք, որ այդ քայլը չի նպաստի վստահության վերականգնմանը, հղի է տարածաշրջանում լարվածության լուրջ սրման վտանգով, և այդ պատճառով էլ այն հակաարդյունավետ է հակամարտության խաղաղ կարգավորմանը»,- ասել էր դեսպանը: