Այսօր՝ նոյեմբերի 12-ին, խոշոր ավտովթար է տեղի ունեցել Գեղարքունիքի մարզում: Ժամը 19:30-ի սահմաններում, «ԲՄՎ X5» մակնիշի ավտոմեքենայի վարորդը Երևան-Իջևան ավտոճանապարհի Ծովագյուղի հատվածում բախվել է «Մոսկվիչ» մակնիշի ավտոմեքենային, դուրս է եկել ճանապարհի երթևեկելի մասից և գլորվել ձորը:
Ինչպես հայտնում է shamshyan.com-ը, վթարի հետևանքով, ըստ նախնական տեղեկությունների, կա 1 զոհ և 2 վիրավոր: Մահացածը կամ զինվորական է, կամ ոստիկանության աշխատակից, քանի որ համազգեստով է: Գյուղացիների օգնությամբ վիրավորները տեղափոխվել են հիվանդանոց:
Դեպքի վայր են ժամանել Ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ վաշտի հրամանատար Սերգեյ Հակոբյանի գլխավորությամբ: ժամանել է նաև ՃՈ 2-րդ սպայական գումարտակի հրամանատարի տեղակալ Դավիթ Ավագյանը:
Տեղում են նաև Ոստիկանության Սևանի բաժնի օպերատիվ քննչական խումբը` Սևանի ոստիկանապետ Վիգեն Աղեկյանի գլխավորությամբ, ովքեր փորձում են պարզել մահացածի և վիրավոր անձանց ինքնությունը: Մինչ ոստիկանների ժամանումը «ԲՄՎ X5» ավտոմեքենայի համարանիշները հանվել էին: