Նազարբաևն ասել է մի բան, որին հակաճառելը բավականին բարդ է: Այս մասին այսօր լրագրողների հետ հանդիպման ժամանակ ասաց երևանյան «Կովկաս» ինստիտուտի ղեկավար, քաղաքական վերլուծաբան Ալեքսանդր Իսկանդարյանը՝ անդրադառնալով Աստանայում Բելառուսի, Ղազախստանի և Ռուսաստանի միջև Եվրասիական տնտեսական միության ձևավորման փաստաթղթի ստորագրման ու Հայաստանի անդամակցության մասին քննարկումներին:
Նա նշեց, որ Հայաստանում սովորաբար քաղաքական դիսկուրսները հակված են ցանկացած տեղեկատվություն ընդունել խուճապահար, այնինչ Աստանայում տեղի են ունեցել պարզ բաներ:
Բանախոսը մեջբերեց Նազարբաևի խոսքերը՝ ՀՀ-ն կարող է ԵՏՄ-ին միանալ իր միջազգայնորեն ճանաչված սահմաններով: « Ինչ-որ մեկը մտածո՞ւմ էր, որ ոչ այդ սահմաններով էր ՀՀ-ն մտնելու, ոչ՝ իհարկե, կամ այլ տարածքներո՞վ, ոչ՝ իհարկե: Երբ գնում էին Ասոցացման համաձայնագրի շուրջ խոսակցությունները, որևէ մեկը մտածո՞ւմ էր, որ Ղարաբաղը ևս կասոցացվեր. ինչո՞ւ է այս աղմուկը:
ԼՂ-ն ՄՄ անդամակցության հայտ չի ներկայացրել, քանի որ չի կարող, Հայաստանը ՄՄ-ին ցանկանում է միանալ որպես Հայաստան: Իրականում ՀՀ-ն ու ԼՂ-ն միասնական տնտեսական տարածք են՝ այդպես էլ մնալու է:
Հայաստանը բավականին հարուստ փաստաթղթային բազա ունի Ռուսաստանի, եվրոպական երկրների հետ, և ԼՂ-ն ևս առկա է, ի՞նչ է փոխվում: Նազարբաևն այդ ամենն ի դեպ ասաց՝ ոչ թե ԼՂ համատեքստում, այլ Ռուսաստանի հետ հարաբերությունների:
Նազարբաևը ջերմ խոսքերով շնորհավորել է Պորոշենկոյին՝ նկատե՞լ էիք: Բելառուսն ուներ սկանդալ Ռուսաստանի հետ, թեև Բելառուսը ՄՄ-ում է: Այսինքն՝ ՄՄ-ում երեք երկրների միջև արդեն կան տարաձայնություններ, որոնք անընդհատյա բնույթ են կրում: Հայաստանն ու ԼՂ-ն ևս օգտագործվելու են այդ տարաձայնությունների շրջանակում: Այդ տարաձայնությունները վերաբերում են նաև ընդլայնման հարցերին: Ուստի Հայաստանի անդամակցությունը գործընթաց է, որը պետք է անցնել:
Մոսկվայում սեպտեմբերի 3-ին քաղաքական որոշում է կայացվել, տնտեսական հարցերում կան հազարավոր կետեր, որոնք պետք է համաձայնեցվեն: Այդ ամենը պետք է ավարտին հասցվի, և այդ գործընթացը գնում է անընդհատ. մի քանի ամիսների ընթացքում անել մի բան, որը երկրներն անում են տարիներով, բարդ է: Թե երբ այդ համաձայնեցումները կհասցնեն ավարտին՝ չգիտեմ, ես զգուշավոր կլինեմ ժամկետների հարցում, չգիտեմ, դա ակտ չէ, այլ գործընթաց»,- ասաց Ալեքսանդր Իսկանդարյանը:
Նա հիշեցրեց, որ Հայաստանը ԼՂ-ն չի միացրել իրեն, Ղարաբաղում հանրաքվե է անցկացվել, կա սահմանային անցակետ, որը ձևական բնույթ է կրում: Այդպիսի ձևական մաքսակետ էլ կլինի ԵՏՄ-ում, ղազախներ չեն կանգնելու այդ հատվածում:
Անդրադառնալով օրերս ՀՀ նախագահ Սերժ Սարգսյանի արձագանքին Աստանայում Նազարբաևի առաջադրած պայմանների վերաբերյալ՝ Իսկանդարյանն ասաց, որ կհամաձայնի նրա այն մտքին, թե ԼՂ հակամարտությունը չի կարգավորվում ՄՄ-ում, քանի որ ԵՏՄ-ում ու ՄՄ-ում խոսքը տնտեսական հարաբերությունների մասին է և ֆորմալ առումով կարգավորման հետ կապ չունի: Ինչ վերաբերում է դիտարկմանը, թե նպաստում է կարգավորմանը, ապա նա այդ կարծիքին չէ:
«Կարգավորումը բարդ մատերիա է, որը իմ կարծիքով՝ հնարավոր չէ քաղաքական մոտ հեռանկարում: Ստատուս քվոյի պահպանմանը ոչ ֆորմալ կերպով կնպաստի, քանի որ ՀՀ-ն ՄՄ է մտնել որոշ անվտանգության առաջնահերթություններից ելնելով»,- ասաց Ալեքսանդր Իսկանդարյանը:
