Ընդդիմադիր գործիչ, ՀԺԿ նախկին անդամ, Բելգիայում ապաստանած Գրիշա Վիրաբյանի կարծիքով՝ Հովիկ Աբրահամյանը ՀՀ հաջորդ նախագահը կլինի, եթե Հայաստանում հստակ ընդդիմադիր ուժ չձևավորվի:
Նա նման տեսակետ հայտնեց «Առաջին լրատվական»-ի հետ զրույցում՝ ընդգծելով, որ Հովիկ Աբրահամյանին լավ ճանաչելով՝ կարող է վստահաբար ասել, որ վերջինս իր ողջ հարստությունը կուտակել է ոչ թե հողագործությամբ, այլ իր համագյուղացիներից հող խլելով:
«Իշխանության մեջ Հովիկ Աբրահամյանի նման բազմաթիվ մարդիկ կան։ Հիմա նա մեր իշխանության դեմքն է և այդ աթոռին է հենց ընդդիմության մեղավորությամբ:
Բոլորին էլ պարզ է, բոլորն այդ մասին գիտեն՝ նա զբաղված է եղել հանցագործ գործունեությամբ,այդ ժամանակ հենց նաև նրա մասին մի թևավոր խոսք էր պտտվում՝ «Մի հարցրեք, թե առաջին միլիոնը որտեղից է։ Մնացած բոլոր միլիոնների մասին կասեմ»։ Նա մեկն է այն օլիգարխներից, ովքեր հաստացան պետության և ժողովրդի հաշվին»:
Մեր այն դիտարկմանը, թե Հովիկ Աբրահամյանի խոսքերով՝ ինքը հողագործությամբ է իր ունեցվածքը ձեռք բերել, Գրիշա Վիրաբյանն արձագանքեց․«Հայաստանի պայմաններն այնպիսին են, որ հողագործությամբ զբաղվողը չի կարող հարստանալ, նրանք հողեր էին վերցնում, հողեր խլում. ամենաթողության մթնոլորտի պայմաններում նրանք հարստացան և ոչ թե քրտնաջան աշխատանքի շնորհիվ»: Նրա խոսքերով՝ այդպիսին եղել է ոչ միայն Հովիկ Աբրահամյանը, այլև իշխանության բոլոր անդամները, նաև նրանք, ովքեր օգնել են այդ մարդկանց գալ իշխանության։
«Հովիկ Աբրահամյանին շատ լավ գիտեմ, գիտեմ՝ ինչպես է մշտապես ստացել աջակցություն, ընտրական հանձնաժողովներում նրանք, ովքեր ընտրություններ էին կեղծում, ամենալավ պայմաններով ամենամեծ քանակով տներն էին ստանում: Արտաշատում որ մի տարածք պետք է վաճառվեր, թերթերում հայտարարություն էին տալիս, որ աճուրդի է իբր հանվել, թերթի հայտարարությունն արվում էր Հոկտեմբերյանի շրջանում կամ Էջմիածնում, որ տեղի բնակիչները չիմանան, հետո ասում էին՝ աճուրդի էր դրվել, ոչ ոք չի առել: Իրենք իրենց միլիոններն այդ թվերին են օրինականացրել»,- ասաց մեր զրուցակիցը:
Ինչ վերաբերում է Հովիկ Աբրահամյանի վարչապետ նշանակվելուն՝ Վիրաբյանն այստեղ հիմնականում տեսնում է ընդդիմության մեղավորությունը․ «Առաջին հերթին ընդդիմությունը պետք է փոխվի։ Այդ ընդդիմությունը տարիների ընթացքում սերտաճեց իշխանության հետ, բացարձակապես ոչ մի տարբերություն չկա:
Ես հիմա հիմնավոր պատասխանատու ձևով ասում եմ՝ հենց ընդդիությունն ամեն ինչ արեց Հովիկ Աբրահամյանին վարչապետ դարձնելու համար: Նրանք այն ժամանակ էլ ամեն ինչ արեցին, որ Հովիկ Աբրահամյանը դառնա Աժ նախագահը:
Ընդդիմության հայտարարությունները դեկլարատիվ բնույթ են միշտ էլ կրել:
Երբ ես իմ թեկնածությունը դրեցի, ոստիկանապետ Ալիկ Սերգեյիչը, որին շատ հարգում եմ, նախապես ասաց, որ ընդդիմությունը չի պաշտպանելու ինձ։ Ասաց՝ 10 օր ժամանակ, թե ընդդիմությունը պաշտպանի՝ ես ոստիկանությանը կասեմ՝ բոլոր միջոցներով կօժանդակեն։ Մենք գրազ էինք եկել։ Տասը օրվա մեջ չկարողացա, ոչ մի հայտարարություն չարեցին «ընդդիմադիրները», ստիպված հանեցի թեկնածությունս, այդպես էլ եղավ։
Այսօր էլ ես Հայաստանում չեմ տեսնում այնպիսի ուժ, որ վարկաբեկված չլինի»։
Վիրաբյանի խոսքերով՝ մեր ժողովուրդը հինգ տարի շարունակ սպասում է ընտրությունների, բայց ամեն անգամ ընդդիմությունը հիասթափեցնում է նրան․«Հետ են քաշվում ու ժողովրդին մենակ թողնում։ Ընդդիմությունը հաջողության հասնելու համար ներքին հեղափոխություն պետք է անի․ այն մարդիկ, որոնք իրենց դեմքը ցույց են տվել՝ համագործակցելով իշխանության հետ, ընդհանրապես պետք է հեռու մնան ընդդիմությունից: Հիմա բոլոր ընդդիմադիրները պարտվել են իշխանությանը, մեզ նոր երիտասարդ ընդդիմադիր գործիչներ են պետք: Հիմա բանուգործը թողած՝ զբաղված են արևմտամետ, ռուսամետ՝ իրար կոկորդ են կրծում»,- ասաց նա:
Նրա խոսքերով՝ ընդդիմադիր բոլոր ուժերը գիտեին, որ Տիգրան Սարգսյանին հենց Հովիկ Աբրահամյանն էր փոխարինելու․ «Իսկ ի՞նչ արեցին. գոնե Տիգրան Սարգսյանը Հովիկ Աբրահամյանից դրական կերպար է։ Մենք չէի՞նք տեսնում, որ Տիգրան Սարգսյանին քննադատողները «Բարգավաճը», Ռոբերտ Քոչարյանի թիմն էր»: