Ազգային ժողովում 2013-ի բյուջեի կատարողականի հաշվետվության քննարկմանը ներկայացած Բնապահպանության նախարար Արամայիս Գրիգորյանից լրագրողները հետաքրքրվեցին նախօրեին կատարված դեպքի մանրամասներով: Հիշեցնենք, որ երեկ լրատվամիջոցներում տեղ էր գտել նախարարությունում կատարվածի աղմկալի միջադեպը, երբ նախարարն, ըստ հրապարակումների, իրեն պահել էր «լկտի» և «կոպիտ», վիրավորել աշխատակիցներին:
«Իմ մամուլի խոսնակն ամբողջությամբ ներկայացրել է խնդիրը, ես ավելացնելու կամ պակասեցնելու ոչինչ չունեմ: Եվ լրագրողները, և հանրապետության ժողովուրդը, բոլորն էլ ինձ ճանաչում են»,- ասաց նա:
Գրիգորյանի խոսնակ Թեհմինա Արզումանյանը երեկ հաստատել է, որ նախարարությունում աշխատանքային քննարկման ժամանակ միջադեպ է գրանցվել՝ կապված ՀՀ ԲՆ տեղեկատվական վերլուծական ՊՈԱԿ-ի տնօրենի տեղակալ Արտակ Գրիգորյանի վարքագծի հետ. տնօրենի տեղակալն, ըստ Արզումանյանի, նախարարի հարցերին՝ իր ղեկավարած կառույցի վերաբերյալ, չի կարողացնել պատասխանել, քանի որ համատեղել է աշխատանքները, չի տիրապետել իրավիճակին: