Ազգային ժողովում գազի հանձնաժողովի գործունեության ժամկետը միգուցե երկարացվի: Այս մասին այսօր «Առաջին լրատվական»-ի հետ զրույցում ասաց Դաշնակցություն խմբակցության քարտուղար և այդ հանձնաժողովի անդամ Աղվան Վարդանյանը:
«Արդեն կատարված որոշակի եզրակացությունների վերաբերյալ կլինի միջանկյալ հաղորդում, կտրվեն գնահատականներ: Հանձնաժողովը տրամադրված է առաջարկել, որ երկարաձգվի ժամկետը, բայց արդեն ԱԺ-ն կորոշի՝ երկարաձգե՞լ կամ մինչև ե՞րբ երկարաձգել, որպեսզի հարցերի վերաբերյալ խորը շարունակական աշխատանք իրականացնենք»,- ասաց Ա. Վարդանյանը:
Վերջինիս խոսքերով՝ հանձնաժողովն իր գոյության այս մի քանի ամիսների ընթացքում բավականին լուրջ աշխատանք է կատարել, բայց դրանք ավելի շուտ նախապատրաստական բնույթի էին: Կազմվել են հարյուրից ավելի հարցաշարեր, որոնք քննարկվել են ոլորտային պատասխանատուների՝ էներգետիկայի նախարարի, Հանրային ծառայությունները կարգավորող հանձնաժողովի նախագահի հետ և բաշխվել են ըստ պատասխանատվության: Հարցերն ուղարկվել են, ստացվել շուրջ 500-600 էջանոց պատասխաններ: Եվ հիմա այդ պատասխանները վերլուծելու, ուսումնասիրելու փուլն է: Հունիսի 12-ին հանձնաժողովը պետք է ԱԺ հաղորդում ներկայացնի:
«Ես կարծում եմ, որ մինչև այսօր աշխատանքները գրեթե 99 տոկոսով անցել են իսկապես խորը քննարկումների և փոխադարձ վստահության մթնոլորտում: Եթե կարողանանք այս մթնոլորտը պահել, վստահ եմ՝ այս հանձնաժողովը կարող է էական դերակատարություն ունենալ ընդհանրապես այս համակարգում»,- ասաց Ա. Վարդանյանը:
Իսկ հանձնաժողովի ձեռք բերած փաստերի և եզրակացությունների արդյունքում հնարավո՞ր է, որ գոնե գազի ներքին սպառման ոլորտում ինչ-որ փոփոխություններ տեղի ունենան. չէ՞ որ ընդդիմությունը պնդում էր, որ սահմանից բաժանորդին հասցնելու ճանապարհին գազի սակագինը կտրուկ և անհիմն կերպով թանկանում է, և այն կարող էր ավելի ցածր լինել: Հարցին ի պատասխան՝ Ա. Վարդանյանն ասաց. «Ներքին ոլորտում կլինեն հստակ պարզաբանումներ, բացատրություններ: Եկեք չշտապենք: Ներքին ոլորտում կլինեն գնահատականներ, բացահայտումներ, եզրակացություններ, առաջարկություններ, որոնք, վստահ եմ, հետագայում կազդեն համակարգի հետագա գործունեության վրա»:
