ԱԺ ՀԱԿ խմբակցության քարտուղար Արամ Մանուկյանը մայիսի 30-ին խորհրդարանում 2013-ի բյուջեի քննարկումների ժամանակ դիմեց ԿԳ նախարարին՝ նշելով, որ իրենք խուսափում են խոսել թիվ հանրակրթության թիվ մեկ՝ լրջագույն խնդրից, այն է՝ տարեցտարի աշակերտների թվի նվազումից: «Մենք խոսում ենք ամեն ինչից, բացի սուբյեկտից`աշակերտից: Տասնհինգ տարի առաջ ՀՀ դպրոցներում եղել է 600.000 աշակերտ, իսկ այսօր այդ թիվը նվազել է՝ դառնալով 370.000»,- ասաց նա: Մանուկյանը նշեց, որ մարզերում և հատկապես՝ գյուղերում գտնվող յուրաքանչյուր չորս դպրոցից մեկում աշակերտների թիվը հարյուրից պակաս է: Սա, ըստ պատգամավորի, դաժան վիճակագրություն է. մեր դպրոցների ծանրաբեռնվածությունը կազմում է 52-53%: «Հարյուրների են հասնում հինգ հոգուց պակաս դասարան ունեցող դպրոցները, ուզեք թե չուզեք՝ սա է մեր երկրի թիվ մեկ խնդիրը, և չխոսել սրա մասին ճիշտ չի լինի»,- նկատեց նա:
ԿԳ նախարար Արմեն Աշոտյանը շեշտեց, որ Հայաստանի դպրոցներում պատգամավորի նշած քանակով աշակերտ եղել է ոչ թե տասնհինգ տարի առաջ, այլ՝ 1991-92 թվականներին, այդուհանդերձ՝ համաձայնեց. Հայաստանում աշակերտների թիվն, իրոք, նվազել է, և սա լուրջ խնդիր է ողջ պետության համար, քանի որ այս կերպ դեմոգրաֆիական ալիքի առաջին հարվածն իր վրա է վերցնում կրթության ոլորտը, ընդ որում այդքանով այդ ալիքը չի ավարտվելու, հետո գալիս է բանակը, տնտեսությունը, հասարակությունը և այլն:
«Չեմ ուզում արտագաղթի թեման քննարկել, որովհետև ես կարող եմ քաղաքական գնահատականներ հնչեցնել, ակնհայտ է, որ դա քաղաքական հարցադրում է բոլոր ժամանակների համար… դեմոգրաֆիական խնդիրների համար մեր նախարարությունը պատասխանատու չէ, բայց Ձեր հարցադրման մի բաղադրիչին եմ ուզում անդրադառնալ` ինչպես կազմակերպել կրթությունը սակավաթիվ աշակերտներ ունեցող դպրոցներում: Իրականում շատ ծանր թեմա է, որովհետև ֆինանսական տեսակետից դպրոցների գործունեությունն արդյունավետ չի դառնում, սակավաթիվ դպրոցներում կրթության տեսակետից որակն ընկնում է»,- ասաց նա:
Մանուկյանն ընդգծեց՝ արտագաղթը ԿԳՆ-ի խնդիրը չէ, այն համապետական է:
