Ազգային ժողովում 2013 թվականի բյուջեի կատարողականի հաշվետվության քննարկման ժամանակ Սփյուռքի նախարար Հրանուշ Հակոբյանը նախ տեղեկացրեց, որ կատարողականը գրեթե 100 տոկոս է: Նախարարը նշեց, որ հաշվետու տարում հաջողությամբ իրականացրել են թե ավանդական, թե նոր ծրագրերը: Նա նաև տեղեկացրեց, որ նախարարությունում առաջնային պլան է մղվում հայոց լեզուն, գումարում են երիտասարդական ֆորումներ՝ «Հայերենն իմ սրտում է» խորագրով, որպեսզի երիտասարդության մեջ շարժում սկսեն: «Հանրապետության նախագահը հայտարարեց, որ տանը խոսենք հայերեն, մենք այդ կարգախոսը փորձում ենք տեղայնացնել նաև մեր համայքներում, որպեսզի բոլորի ուշադրությունը հրավիրենք լեզվի խնդիրների վրա»,-ասաց նախարարը: Հակոբյանը տեղեկացրեց, որ իրենց նախարարությունն էլ արգելում է այլ լեզվավ խոսել. բոլոր նրանք, ովքեր մտնում են նախարարություն, եթե նույնիսկ երկու բառ պիտի խոսեն, խոսում են հայերեն:
«Խոսում են երկու բառ, մի կերպ՝ հայերեն… չեմ թողնում, որ ուրիշ լեզվով խոսեն, խեղճերն էլ տանջվելով մի կերպ հայերեն են խոսում, որ մենք փորձենք մեր լեզվի խնդիրը պահպանել: Կարելի է ասել՝ նախարարությունում արգելված է ուրիշ լեզվով խոսել»,- ասաց նա՝ հավելելով, որ բոլոր համայնքային կազմակերպության ղեկավարներից պահանջում է՝ եթե միջոցառում են անում այս կամ այն երկրում, պիտի թարգմանիչ բերեն ու հայերեն անեն այդ միջոցառումը, որպեսզի այդ հավաքը նպատակին հասնի: Նախարարությունում դրվում է նաև արևմտահայերենի ու արևելահայերենի մերձեցման խնդիրը, տպագրել են արևմտահայերեն գրքեր ու քերականության դասագրքեր: Հակոբյանի խոսքով՝ արևմտահայերենը ազգային արժեք է, ուստի համալսարանում էլ արևմտահայերերնի ուսուցման ամբիոն է ստեղծվում:
