Արդեն երեք օր է՝ մեկ տարեկան Նժդեհը գիշերում է Էջմիածնի այգում: Երեք ամիս բնակարանի վարձավճարը վճարել չկարողանալու պատճառով տանտերը վարձակալած բնակարանից հանել է նրանց ընտանիքը: Փոքրիկի մայրը՝ Լաուրա Մարտիրոսյանը, Նժդեհին գրկած եկել էր կառավարության շենքի մոտ և առանց հուզվելու չէր կարողանում խոսել: Մայրը, փոքրիկը և ամուսնու տատիկը հայտնվել են դրսում:
Լաուրայի ամուսնու տատիկը՝ Մելանյա Մկրտչյանը, ներկայացրեց խնդիրը: Նորաստեղծ ընտանիքում արդեն երեք ամիս է՝ վարձավճարի հետ կապված խնդիր է ծագել: Լաուրայի ամուսինը՝ առաջին կարգի հաշմանդամ, մեկնել է ՌԴ աշխատելու, սակայն այնտեղ ոչ մի տեղ գումար չեն տվել, հիմա Մոսկվայում հայտնվել է փողոցում, անձնագիրը վերցրել են ձեռքից: Հիմա քույրը գնացել է, որ եղբորը բերի Հայաստան:
«Երեք ամիս է՝ չեն վճարել, խազեինը հանել է դուրս: Հինգ անգամ նամակ ենք ուղարկել նախագահին և Հովիկ Աբրահամյանին, մարզպետն էլ պատասխանում է, որ առայժմ բնակարան չունի, որ տա, ապրենք, բայց խաբում է, քանի որ հանրակացարանում լիքը ազատ տեղ կա, բայց չի տալիս»,- ասաց տատիկը:
Ըստ նրա՝ Արմավիրի մարզում հանրակացարանում ազատ տեղ կա, քաղաքապետին դիմել են, մարզպետն է, որ ամեն ձևով մերժում ու խաբում է, և իրենք երեք օր է՝ գիշերում են դրսում, նստում են այգու մեջ:
«Ամուսնուս խաբեցին, տարան այնտեղ, քաշեցին: Առողջությունը վատացել է, մենք էլ երեք օր է՝ գիշերում ենք Էջմիածնի այգում, մեր վեշերի հետ»,- հուզված ասաց անպաշտպան Լաուրա Մարտիրոսյանը:
