Բրիտանացի հրուշակագործ և գուրման Չառլի Հարի Ֆրենսիսը, ով հայտնի է յուրահատուկ խոհանոցային ստեղծագործություններով, ինչպես օրինակ՝ վիագրայով պաղպաղակ, ցանկացած սննդից տարբեր համերով «ուտելի» գոլորշի ստացող սարք է ստեղծել: Այս մասին հայտնում է Huffington Post-ը: «Ուտեստները» ոչ մի կալորիա չեն պարունակում և պահպանում են նախնական մթերքի սկզբնական համային որակները:
Lick Me I`m Delicious ընկերության հիմնադիր Ֆրենսիսը բացատրել է, որ իր նոր նորույթի գլխավոր իմաստն այն է, որ հիմա համեղ ուտել սիրողները կկարողանան չմտածել գիրանալու մասին: Նա պատմել է, որ իր հորինած սարքը կարող է գոլորշի ստանալ բացարձակապես ցանկացած բույրով՝ բեկոնի, պոպկորնի, խնձորի կարկանդակի և նույնիսկ գրքի կամ մարդու մազերի հոտով:
Ուտելի «մառախուղ» արտադրող սարքի աշխատանքի սկզբունքը գործնականում նույնն է, ինչ ցանկացած գոլորշիացնող սարքինը: Հումքը (սնունսը) տաքացվում է մինչև բուրավետ գոլորշու առաջանալը, որը հետո հնարավոր է ներշնչել:
Մեծ Բրիտանիայի բնակիչները կկարողանան սարքը վարձակալել տարբեր երեկույթների, տոների համար: Օտարերկրացիներին այն վարձով չի տրվում: Իսկ գնել հնարավոր է 8400 դոլարով՝ չհաշված առաքման ծախսը:
