Բրազիլիայում Ֆուտբոլի աշխարհի առաջնության շրջանում հյուրանոցների համարների գներն իջել են՝ այցելուների սղության պատճառով: Հյուրանոցների և հանրային սննդի հարցերով բրազիլական ֆեդերացիայի տվյալներով՝ հյուրանոցների գներն ընկել են մոտ 50 տոկոսով: Այս մասին հայտնում է ITAR-TASS-ը:
Գերատեսչության նախագահ Ալեշանդրի Սամպայուի խոսքով՝ բոլոր 12 քաղաքներում, որտեղ կանցկացվեն առաջնության խաղերը հունիսի 12-ից հուլիսի 13-ն ընկած ժամանակահատվածում, կարելի է զբոսաշրջային դասի հյուրանոցային համար գտնել միջինը 500 ռեալով (2.2 ռեալը՝ 1 դոլար): 4-աստղանի հյուրանոցում մեկ գիշերն անցկացնելն արժե 650 ռեալ, իսկ 5-աստղանի հյուրանոցում կարելի է գիշերել 800 ռեալից ոչ էժան:
Զբոսաշրջիկների ընդունելությունից գերշահույթ ստանալու գործարարների հաշվարկները կարող են հօդս ցնդել:
Հյուրանոցային պատվիրված համարների ցուցանիշով աչքի է ընկնում Ռիոն, որտեղ ազատ է հյուրանոցային համարների միայն 2 տոկոսը: Դա զարմանալի չէ, քանի որ քաղաքը համարվում է Բրազիլիայի գլխավոր զբոսաշրջային կենտրոններից մեկը, բացի այդ՝ «Մարականա» լեգենդար մարզադաշտում կանցկացվի մրցաշարի եզրափակիչը: