Գերմանիայի կանցլեր Անգելա Մերկելը «տխուր» է անվանել Եվրոպայում ընտրողների շրջանում աջ ծայրահեղական և եվրասկեպտիկ կուսակցությունների աջակցության աճը: Նա հավելել է, որ ի պատասխան դրա՝ անհրաժեշտ է խթանել ԵՄ տնտեսության աճը: Այս մասին փոխանցում է BBC-ն:
Մայիսի 22-25-ն անցկացված Եվրախորհրդարանի ընտրություններում տեղերի մեծամասնությունը կրկին պահպանել են երեք հիմնական բլոկները՝ աջ կենտրոնամետները, ձախերն ու լիբերալները, սակայն կուսակցությունները, որոնք պահանջում են ԵՄ լիազորությունների սահմանափակում կամ միության լիարժեք արձակում, մեծացրել են իրենց ներկայությունը խորհրդարանում:
Ֆրանսիայի վարչապետ Մանուել Վալսը երկրում աջ ծայրահեղական կուսակցության հաղթանակն անվանել է «երկրաշարժ» և ասել, որ առանց րոպե կորցնելու Եվրոպան պետք է փոխի ուղղությունը՝ դիմակայելու պոպուլիստական կուսակցություններին:
Իսկ Մեծ Բրիտանիայի վարչապետ Դևիդ Քեմերոնը հայտարարել է, որ ընտրողները, ակնհայտորեն, խորապես հիասթափված են Եվրոպայից, և որ ինքը նրանց հստակ լսել է:
Նրա խոսքով՝ ընտրությունների արդյունքները միանշանակ ցույց են տալիս, որ միավորված Եվրոպան չի կարող այլևս լինել այնպիսին, ինչպիսին նախկինում: Նրա խոսքով՝ Եվրախորհրդարանի ընտրությունների արդյունքները վկայում են այն մասին, որ մարդիկ փոփոխություների են սպասում միության աշխատանքի կառուցվածքում:
