ԱՄՆ-ի Յեյլի համալսարանի ուսանողները ցուցադրաբար լքել են դահլիճը, որտեղ ելույթ էր ունենում Գերմանիայի պաշտպանության նախկին նախարար Կառլ-Թոդոր ցու Գուտենբերգը, որին մեղադրում են գրագողության մեջ: Այս մասին հաղորդում է The Yale Daily News-ը:
Նոյեմբերի 7-ին ցու Գուտենբերգը պետք է դասախոսություն կարդար «Տրանսատլանտյան հարաբերությունների առասպելները» թեմայով:
Միջոցառումից քիչ առաջ Յեյլի ուսանողները ստացել էին նրա դասախոսությունը բոյկոտելու կոչերով նամակներ: Դրանցում ասվում էր, որ նա, լինելով Գերմանիայի պաշտպանության նախարար, վիրավորել է ողջ ակադեմիական հասարակությանը ու հրաժարվել է պատասխանատվություն կրել գրված ատենախոսության համար:
«Այստեղ ձեզ ուրախ չեն տեսնել»,- հայտարարել են դահլիճը լքող որոշ ուսանողներ: «Ես ձեզ կպատմեի այդ մասին (ատենախոսության հետ կապված պատմության), եթե դուք մնայիք, նաև` ամոթի ու սխալների մասին»,- ասել է Գուտենբերգը: «Մենք գնում ենք գրադարան»,- ասել են ցուցարարները: «Պարզ է, պարզ է»,- համաձայնել է վերջինս:
Նրա հետ հանդիպմանը ներկա է եղել շուրջ 70 մարդ:
Ցու Գուտենբերգն ասել է, որ ամաչում է կատարվածի համար, ու հենց այդ պատճառով էլ ցանկանում է հասարակությանը ինչ-որ բան տալ, օրինակ՝ իր փորձն ու գիտելիքները հաղորդել մարդկանց:
Նա ԳԴՀ պաշտպանության նախարարի պաշտոնը զբաղեցրել է 2009թ. հոկտեմբերից 2011թ. մարտն ընկած ժամանակահատվածում:
