Արգենտինայի հավաքականի հարձակվող Սերխիո Ագուերոն Բրազիլիայում կայանալիք 2014 թվականի աշխարհի առաջնության վերաբերյալ ընդգծել է, որ իր թիմն ընդունակ է հաղթելու մրցաշարում: «Մանչեսթեր Սիթի»-ի ֆուտբոլիստը նաև նշել է, որ լիովին ապաքինվել է վնասվածքից և գտնվում է լավ մարզավիճակում:
«Այժմ ես լիովին առողջ եմ: Մասնակցել եմ «Մանչեսթեր Սիթի»-ի վերջին հանդիպմանը, քանի որ շատ էի ցանկանում օգնել թիմիս կրկին դառնալու Անգլիայի չեմպիոն: Այժմ ես սպասում եմ աշխարհի առաջնությանը: Դա մեծ իրադարձություն է լինելու բոլոր հավաքականների համար:
Իհարկե, մենք կարող ենք աշխարհի չեմպիոն դառնալ, քանի որ մեզ հետ է Լիոնել Մեսսին` մոլորակի լավագույն ֆուտբոլիստը: Մեր թիմն ունի տաղանդ և ունակություններ: Դրանք բավական են, որպեսզի հաղթենք յուրաքանչյուր հավաքականի:
Երկպագուներն ասում են, որ մենք թույլ խմբում ենք հայտնվել: Բայց ես միանշանակ համաձայն չեմ դրա հետ: Հնարավոր է` հին արտահայտություն կանեմ, բայց աշխարհի առաջնությունում թույլ մրցակիցներ չեն լինում»,- Ագուերոյի խոսքերը մեջբերում է Goal.com-ը:
