Ադրբեջանական Turan լրատվական գործակալությանփոխանցմամբ`Reporters without borders կազմակերպությունը կտրականապես դատապարտել է 2012 թվականի նոյեմբերի 5-ին ադրբեջանական դատարանի կայացրած վճիռը, որով սառեցվել են երկրի գլխավոր ընդդիմադիր թերթի՝ «Ազադլըղի» բանկային հաշիվները:
Կազմակերպության տարածած հայտարարության մեջ ասվում է, որ դա ապօրինի որոշում է և հանդիսանում է վերջին ամիսներին թերթին խեղդելու ուղղությամբ գործադրվող ջանքերի վճռական փուլը. «Խոշոր տուգանքները թերթին դրել են բարդ կացության մեջ: Թերթի գոյությունը ներկայումս ավելի մեծ հարցականի տակ է, քան դա եղել է երբևէ:
Ադրբեջանի ընդդիմադիր թերթերի մեծ մասը փակվել է: Հեռուստա- և ռադիոհեռարձակումն ամբողջությամբ վերահսկվում է իշխանությունների կողմից: Այդպիսի պայմաններում «Ազադլըղի» փակումը մահացու հարված կհանդիսանա ադրբեջանական ԶԼՄ-ներում բազմակարծությանը»:
Նշվում է, որ թերթի բանկային հաշիվների կալանքի տակ դրվելը կապված է տուգանքների վերաբերյալ դատավճիռների հետ: Թերթի քննադատել է մի շարք չինովնիկների, ինչի համար նրանք դատական հայցեր են ներկայացրել թերթի դեմ: Երեք հայցերով սահմանված տուգանքի ընդհանուր չափը կազմել է 66,000 մանաթ (1 դոլարը հավասար է 0.78 մանաթ):
