«Ես ինքս՝ որպես մասնագետ, որպես քաղաքացի, կարծում եմ, որ Հայաստանում նախագահն ու վարչապետը խանգարում են մեկը մյուսին: Իմ կարծիքով՝ լավ կլինի, որ լինի անմիջական նախագահական կառավարման համակարգ, կամ վարչապետական: Պետությունն ավելի ուժեղ է, երբ միամոմենտ են կատարվում օրենսդիր եւ գործադիր մարմինների ընտրությունները»,- նախօրեին սահմանադրական բարեփոխումների նախնական հայեցակարգի թեմայով քննարկման ժամանակ «Առաջին լրատվական»-ի հետ զրույցում ասաց իրավապաշտպան Արտակ Զեյնալյանը: Նրա խոսքով, սակայն, այդ բարեփոխումները ժամանակավրեպ են, քանի որ այսօր Հայաստանում ժողովրդին մեկ հարց է հետաքրքրում. ինչպես արտասահմանում գործ ճարի, գնա աշխատի:
«Եվ այս ամենը, իմ կարծիքով, չի հետաքրքրում ժողովրդին: Մենք չպետք է ժողովրդի վզին փաթաթենք մեր համոզմունքները: Այս պահին ժողովուրդն ամեն ինչից օտարված է: Այս պահին ժողովրդին ոչ մի բան չի հետաքրքրում:
Սահմանադրական բարեփոխումներից առաջ ժողովրդի մոտ պետք է արթնացնել վստահությունը ընտրական համակարգի նկատմամբ: Սահմանադրական բարեփոխումները միայն ընտրական ինստիտուտի միջոցով է հնարավոր անել: Ժողովուրդը պետք է տեսնի, որ իր քվեն չի կեղծվի, որ չի հավելագրվի մասնակիցների թիվ»,- նկատեց Զեյնալյանը:
Նրա խոսքով՝ եթե բարեփոխումների հայեցակարգը դրվի հանրաքվեի, ապա մասնակցություն չի լինի հանրաքվեին, ինչպես 2005 թվականին:
