Ռուսաստանը Մեծ Բրիտանիայի իշխանություններից պաշտոնական պարզաբանում է պահանջել Ռուսաստանի նախագահի հասցեին արքայազն Չարլզի արտահայտությունների մասին հաղորդագրությունների կապակցությամբ: Ria Novosti-ի փոխանցմամբ՝ այս մասին հայտարարել է ՌԴ ԱԳՆ պաշտոնական ներկայացուցիչ Ալեքսանդր Լուկաշևիչը:
«Մենք Բրիտանիայի իշխանություններից պաշտոնական պարզաբանում ենք պահանջել արքայազն Չարլզի արտահայտությունների կապակցությամբ»,- ասել է նա:
Ավելի վաղ բրիտանական ԶԼՄ-ներում լուր տարածվեց, որ արքայազն Չարլզը Կանադայի Գալիֆաքս քաղաքում Հոլոքոստ վերապրած կնոջ հետ զրույցում Ռուսաստանի նախագահ Վլադիմիր Պուտինի քաղաքականությունն Ուկրաինայում համեմատել է Ադոլֆ Հիտլերի գործողությունների հետ: Ուելսի արքայազնի խոսքերը լրագրողների համար մեջբերել է նրա զրուցակիցը, ով խոստովանել է, որ զարմացել էր՝ լսելով դրանք: Բրիտանական թագավորական ընտանիքի անդամները սովորաբար խուսափում են հանրային քաղաքական հայտարարություններից:
