Գվատեմալայում ուժեղ երկրաշարժի զոհերի թիվը հասել է 48-ի: Այս մասին հաղորդում է BBC-ին՝ վկայակոչելով երկրի նախագահ Օտո Պերես Մոլինային, ով անձամբ է այցելել աղետից տուժած շրջաններ:
«Մենք ցավով ստիպված ենք արձանագրել 48 մարդու մահ, սա իսկական ողբերգություն է»,-ասել է նախագահը՝ հավելելով, որ վերջին 36 տարումսա երկրի ամենաուժեղ երկրաշարժն է:
Ներկա պահին վիրավորների թիվը հասնում է 155-ի, անհետ կորած է համարվում 100 մարդ:
Մոլինան նշել է, որ Գվատեմալայի կառավարությունն ունի բոլոր անհրաժեշտ միջոցները տուժածներին օգնություն ցուցաբերելու համար: Նա շնորհակալություն է հայտնել Իսպանիայի և Վենեսուելայի իշխանություններին, որոնք առաջինն են պատրաստակամություն հայտնել մարդասիրական օգնություն ուղարկել: Գվատեմալային օգնելու պատրաստակամություն են հայտնել նաև Հոնդուրասը, Սալվադորը և Պանաման:
Վերջին տվյալներով՝ երկրաշարժի մագնիտուդը կազմել է 7.2 բալ: Ամեաշատը տուժել է Սան-Մարկոս քաղաքը, որտեղ զոհվել 39 մարդ, ավերվել ավելի քան 50 տուն: Զգալիորեն տուժել են տեղի իշխանական մարմինների և ոստիկանության շենքերը:
Աղետի վայր են ուղարկվել ուղղաթիռներ, ավելի քան 2000 զինվորականներ, որոնք օգնում են մաքրել փլատակները ևհասարակական կարգ են պահպանում։
Տուժած շրջաններում խափանվել է ճանապարհային հաղորդակցությունը։ Շատ բնակավայրեր շարունակում են մնալ առանց էլեկտրականության և հեռախոսակապի:
Երկրաշարժը զգացվել նաև Կոստա Ռիկայում, Մեքսիկայում, Սալվադորում:
