Քիչ առաջ մեկնարկեց «Եվրոպական ընտրություն» նախնական անունը կրող նախաձեռնության աշխատանքային հավաքը: Նախաձեռնող խումբը, որի կազմում են Գայանե Առուստամյանը, Հակոբ Բադալյանը, Լևոն Բարսեղյանը, Աղասի Ենոքյանը, Զարուհի Հովհաննիսյանը, Նազենի Ղարիբյանը, Վահրամ Մարտիրոսյանը, Բորիս Նավասարդյանը, Աննա Շահնազարյանը և Արթուր Սաքունցը, կոչ էր արել «Ազատություն», «Ազգային ինքնորոշում միավորում», «Ազատ դեմոկրատներ», «Հայոց համազգային շարժում», «Հանրապետություն», Հայաստանի պահպանողական, «Ժառանգություն», «Ժողովրդավարական հայրենիք» կուսակցություններին և «Քաղաքացիական պայմանագիր» հանրային- քաղաքական միավորմանը և բոլոր այն քաղաքական ուժերին, հասարակական կազմակերպություններին և անհատներին, որոնք համարում են, որ Հայաստանի անդամակցումը Մաքսային միությանն անդառնալի չէ, մասնակցել նախաձեռնության հիմնադրմանն ու հետագա գործունեությանը:
Հավաքին ներկա են նախաձեռնող խմբի անդամները, ԱԱԾ նախկին ղեկավար Դավիթ Շահնազարյանը, գրող, հրապարակախոս Մարինե Պետրոսյանը, որոշ կուսակցությունների ներկայացուցիչներ, անհատ քաղաքացիներ, ԱլԳ հայաստանյան ազգային քաղաքացիական պլատֆորմի ներկայացուցիչներ և այլք:
Իր բացման խոսքում Բորիս Նավասարդյանը նշեց, որ նախաձեռնությունն ունի հասարակական-քաղաքական բնույթ, այստեղ կարող են միավորվել և կուսակցություններ, և քաղհասարակության ինստիտուտներ, և անհատ քաղաքացիներ: Ըստ նրա՝ այդ ձևաչափով էլ աշխատելու է հետագայում:
Հրապարակախոս Վահրամ Մարտիրոսյանն ասաց, որ կողմ է եղել այսպիսի դաշինքի ձևավորմանը, որովհետև վստահ է, որ սեպտեմբերի 3-ին ՀՀ ինքնիշխանությունը վտանգի տակ է դրվել կոպիտ թելադրանքի և ստորացումների մի ամբողջ շարքի ներքո: Նա նշեց, որ իրենց քննարկումների արդյունքում հնչել են մտքեր, թե ինչու՝ «Եվրոպական ընտրություն» և ինչու՝ «Ո՛չ Մաքսային միության»-ը:
Այսպիսի մոտեցումը այս պահին ջուր է լցնում ՄՄ ընթացքի ջրաղացին, ՀՀ ինքնիշխանության համար պայքարում: ՀՀ-ն կարիք ունի դաշնակցի, և այդ դաշնակիցը ԵՄ-ն է: Իրադարձությունների ընթացքը ցույց տվեց, որ ոչ միայն ԵՄ-ն է ՀՀ-ին պետք՝ իր արժեքային համակարգով, այլև ՀՀ-ն է պետք այդ միությանը: «ՄՄ-ին «ոչ» ասել չի նշանակում «այո» ասել Եվրոպայի հետ ասոցացմանը»,- ընդգծեց Վահրամ Մարտիրոսյանը:
Արթուր Սաքունցը ներկաների հետ կիսվեց նախաձեռնությունը ձևավորելու նպատակահարմարության և անհրաժեշտության հարցերի շուրջ, խոսեց իր մտահոգությունների և քաղաքական կուսակցությունների՝ ամբիցիաները մի կողմ դնելու և միավորվելու անհրաժեշտության մասին:
Իրավապաշտպանն ասաց, որ նախաձեռնության նախնական ձևավորման աշխատանքների ժամանակ բավական շատ դրական արձագանքներ է լսել և լիահույս է, որ կհաջողեն համախմբման դեպքում: «Մարտահրավերը միասնություն է պահանջում, տարանջատ աշխատելն այլևս անիմաստ է դառնում: Համաձայն էի, որ դիմենք ԱԺ-ում չներկայացված կուսակցություններին ու ստանանք պատասխաններ: Հուրախություն մեզ, թեկուզ շատ քիչ, բայց ֆեյսբուքյան քննարկումների ժամանակ առանձին անհատներ էին դիմում. դա շատ կարևոր էր: Քաղաքացիական մոբիլիզացիան կարևոր է, ցավալի էր, որ սեպտեմբերի 3-ից հետո քաղաքացիական նախաձեռնությունները, որոնք ուղղված էին մարտահրավերի դեմ, փոքրաթիվ էին, բայց դա չի նշանակում, որ իրապես փոքրաթիվ էին»,- ասաց Արթուր Սաքունցը:
Նա շնորհակալություն հայտնեց մասնակիցներին հանդիպումը հնարավոր դարձնելու համար:
Գայանե Առուստամյանն իր խոսքում բացատրեց, թե ինչու է կատարել եվրոպական ընտրություն: Լրագրողն ասաց, որ ցանկանում է ապրել ազատ երկրում, որտեղ սեռական կողմնորոշման, խոսքի ազատության համար չես հետապնդվի:
Աննա Շահնազարյանն ասաց, որ կուսակցությունների գործելու ժամանակն է, պետք է գիտակցեն, որ պետք է գործ անել: Նրա խոսքով՝ պետք է այդ պահանջն իջեցնել:
Բորիս Նավասարդյանը տեղեկացրեց, որ պաշտոնական գրավոր պատասխան ունեն «Քաղաքացիական պայմանագիր» հանրային- քաղաքական միավորումից, որը կոչին արձագանքել է, տեղեկացնելով, որ «ոչ-ոչ»-ի կողմնակիցն է: Նավասարդյանի փոխանցմամբ` «Ժառանգություն»-ը տեղեկացրել է, որ պետք է քննարկի միանալու հարցը: Ըստ նրա՝ Պահպանողական կուսակցության դիրքորոշումն է անորոշ:
«Ազատություն»-ից հավաքին ներկա էր կուսակցության ներկայացուցիչ Մեսրոպ Մեսրոպյանը, ով ասաց, որ կուսակցությունը ՄՄ անդամակցության որոշումը չի ողջունում և ընդունում, սակայն ԵՄ-ի հետ ասոցացվելը ևս չի ընդունում. ներկա է հավաքին, սակայն առայժմ չի միանալու հայտարարությանը:
Կարեն Կարապետյանը՝ ՀՀՇ կուսակցության գործադիր քարտուղարը, ողջունեց հավաքը, օրակարգը: Նա նշեց, որ իրենց կուսակցության համար սկզբունքային են նման դաշինքները: Սակայն նշեց, որ միանձնյա որոշում չի կարող կայացնել և չլսել իր կուսակցության կարծիքը, եթե հավաքին որոշում կայացվի հայտարարություն տարածել: Հայտարարությանը միանալու համար, ըստ նրա, փաստաթուղթը պետք է քննարկվի կուսակցությունում, որից հետո կուսակցության վերջնական մոտեցումը փաստաթղթի վերաբերյալ կհայտնվի:
Հավաքին էր ներկա նաև ԱԻՄ ներկայացուցիչ Արսեն Պողոսյանը, ով նշեց, որ եվրոպական ընտրությանն այլընտրանք չկա: ԱԻՄ-ն, ըստ նրա, իր եվրոպական ընտրության քաղաքականությանը ծրագրով է ամրագրել, դիրքորոշումը վաղուց է որդեգրել, ուստի ԱԻՄ-ը կարևորում է միջոցառումը:
«Ժողովրդավարական հայրենիք» կուսակցության ներկայացուցիչ Հենրիկ Սահակյանը ևս տեղեկացրեց, որ Եվրոպան աշխարհի կենտրոնն է՝ արժեքներով, սակայն Եվրոպան մեր իրավունքները ևս տրորել է: «Մենք եվրոպական նիստուկացին, եվրոպական ինտեգրացիային, արժեքներին միանալու կողմնակիցն ենք, բայց միացնելուն դեմ ենք»,-նշեց նա:
Լուսանկարը՝ A1plus.am-ի
