Կրասնոդարի երկրամասում թոշակառու կինը մուրճով մահանալու աստիճան ծեծել է իր թոռանը: Ինչպես ավելի ուշ խոստովանել է 66-ամյա կինը, անհնազանդ աղջկա մեջ ինքը «սատանա է տեսել», հայտնում է vesti.ru-ն՝ հղում անելով ՌԴ հետաքննչական կոմիտեի Կրասնոդարի երկրամասի հարցերով հետաքննչական վարչությանը:
Դեպքը տեղի է ունեցել դեռ 2013-ի հուլիսի 30-ին, երբ տատիկը տանն է եղել իր 11-ամյա թոռնիկի հետ: Ճաշի ժամանակ երեխան չի ենթարկվել նրան: «Թոշակառու կնոջ խոսքով՝ ինքն այդ պահին թոռան մեջ սատանա է տեսել: Այդ ժամանակ կինը վերցրել է մուրճն ու հարվածել աղջկա գլխին»,- հայտնել են հետաքննչական վարչությունում:
Աղջիկը փորձել է փախչել տատիկից, բայց վերջինս բռնել է նրան ու ևս մի քանի անգամ հարվածել գլխին: Ստացած վնասվածքներից երեխան տեղում մահացել է: Հետո թոշակառուն տեղի ունեցածի մասին հայտնել է իր աղջկան և փորձել է ինքնասպան լինել: Տեղի ԶԼՄ-ների հաղորդմամբ՝ նա սկսել է մուրճով իրեն հարվածել, բայց հարևանները, որոնք նրա բնակարանում աղմուկ են լսել, ոստիկանություն են կանչել: Կնոջը հաջողվել է փրկել:
Կնոջը մեղադրանք է առաջադվել մանկահասակ երեխայի սպանության համար: Հոգեբանական-հոգեբուժական փորձաքննությունը ցույց է տվել, որ կինը հոգեկան խանգարում ունի, ինչի պատճառով չի գիտակցել, թե ինչ է անում: Դատարանը կնոջը հարկադիր բուժման է ուղարկել: Նա կբուժվի մասնագիտացված հոգեբուժական կլինիկայում:
