ՀՀ ԱԳ նախկին նախարար, ԲՀԿ-ական պատգամավոր Վարդան Օսկանյանի «Սիվիլիթաս»-ի գործով բանկային ստուգումներ են սկսվել: Այս մասին այսօր «Առաջին լրատվական»-ի հետ զրույցում տեղեկացրեց Օսկանյանի փաստաբան Տիգրան Աթանեսյանը: Նա նշեց, որ որոշումները տրվել են իրենց, եթե ունենան միջնորդությունների կարիք, միջնորդություն կներկայացնեն:
«Պարոն Օսկանյանը ոչ մի կրիմինալ չի իրականացրել, որ բանկային հաշիվներ ստուգելը վտանգ ներկայացնի: Իսկ ցուցմունքներ շարունակել չտալն իր իրավունքն է»,- հստակեցրեց Տ. Աթանեսյանը:
Նա վերահաստատեց բազմիցս հայտնած իր այն կարծիքը, որ այս գործը քաղաքական հետապնդում է, և դրան իրավաբանական որակումներ տալը շատ բարդ է: Փաստաբանի համոզմամբ՝ սա իրավաբանություն չէ:
Հիշեցնենք, որ ԱԱԾ քննչական վարչությունում քրեական գործ էր հարուցվել մայիսի 25-ին ԱԱԾ-ի կողմից «փողերի լվացման» հատկանիշներով, այն առնչվում էր Սիվիլիթաս հիմնադրամին և նրա հիմնադիր Վարդան Օսկանյանին, ով պատգամավորական անձեռնմխելիությունից զրկվելուց հետո այդ գործի շրջանակներում ներգրավվել է որպես մեղադրյալ։
