Օրերս Կենտրոն և Նորք-Մարաշ վարչական շրջանների ընդհանուր իրավասության դատարանում նախագահող դատավոր Մխիթար Պապոյանը հրապարակեց Արտակ Մելքոնյանի դատավճիռը:
Մելքոնյանին նախաքննական մարմինը մեղադրանք էր առաջադրել 2010 թվականի նոյեմբերի 14-ին Զավարյան փողոցում 12-ամյա Սարգիս Վարդիկյանին առանձին դաժանությամբ, դանակի 21 հարվածով դիտավորությամբ սպանելու և սառը զենք կրելու համար՝ ՀՀ քրեական օրենսգրքի 104 հոդվածի 2-րդ մասի 5-րդ կետով և 235 հոդվածի 4-րդ մասով:
Ըստ նախաքննական մարմնի՝ սպանությունը կատարվել էր վրեժի հողի վրա. դեպքից մեկ տարի առաջ՝ 2009 թվականի նոյեմբերի 29-ին առանձին դաժանությամբ սպանվել էր Արտակ Մելքոնյանի որդին՝ Սոսը: Ուժի մեջ մտած դատական ակտով Սոս Մելքոնյանի սպանությանն առնչվել էր այն ժամանակ տասնմեկամյա Սարգիս Վարդիկյանը, բայց օրենքով սահմանված տարիքի հասած չլինելու հիմքով քրեական պատասխանատվությունից ազատվել էր:
Մեղադրողը միջնորդել էր Արտակ Մելքոնյանին դատապարտել 12 տարի, իսկ տուժողի իրավահաջորդը՝ Սարգիս Վարդիկյանի հայրը՝ ցմահ ազատազրկման: Արտակ Մելքոնյանի պաշտպանի կարծիքով՝ սպանությունը կատարվել էր հոգեկան խիստ հուզմունքի վիճակում:
Ինչպես տեղեկացրեց Մելքոնյանի շահերի պաշտպան Ռազմիկ Թովմասյանը, դատարանը հաստատված չի համարել, որ Արտակ Մելքոնյանը սպանությունը կատարել է առանձին դաժանությամբ: Արարքը վերաորակվել է որպես դիտավորյալ սպանություն՝ քրեական օրենսգրքի 104 հոդվածի 1-ին մասով: Արտակ Մելքոնյանը դատապարտվել է 11 տարի 6 ամիս ազատազրկման:
Հնարավոր է, որ կողմերը դատավճռի դեմ վերաքննիչ բողոքներ ներկայացնեն:
