Ազգային ժողովը երեկ 78 «կողմ», 21 «դեմ» և 3 «ձեռնպահ» ձայներով երկրորդ ընթերցմամբ ընդունեց ՀՀ քննչական կոմիտեի մասին օրենքի նախագիծը և համապատասխան օրենսդրական փոփոխությունների փաթեթը:
Այդպիսով, ամիսների ուշացումով Քննչական կոմիտեն կսկսի գործել ՀՀ նախկին գլխավոր դատախազ Աղվան Հովսեփյանի գլխավորությամբ: Տեղեկություն կար, որ այն գործելու էր հունվարի 10-ից, հետո՝ մարտի 1-ից, սակայն կոմիտեն կձևավորվի ամռանը:
Հիշեցնենք, որ ՀՀ գլխավոր դատախազի պաշտոնից Աղվան Հովսեփյանի հեռացումից հետո դատախազության մի շարք պաշտոնյաներ նույնպես հեռացան կամ հեռացվեցին, և խոսակցություն կա, որ նրանց մի մասն ընդգրկվելու է նորաստեղծ քննչական կոմիտեում: Ներկայումս գործող հինգ քննչական մարմիններից Քննչական կոմիտեի կազմում առայժմ կընդգրկվեն երկուսը` Ոստիկանության և Պաշտպանության նախարարության քննչական մարմինները, որոնք իրականացնում են բոլոր քննությունների մոտ 95 տոկոսը: Օրենքով Քննչական կոմիտեի նախագահը յուրաքանչյուր տարի հանրապետության նախագահին և կառավարություն է ներկայացնելու գրավոր հաղորդում՝ Քննչական կոմիտեի նախորդ տարվա գործունեության մասին:
Առավել ուշագրավ էր օրինագծի քվեարկությունը. ՀԱԿ-ը կողմ է քվեարկել նախկին դատախազ Աղվան Հովսեփյանի ղեկավարելիք քննչական այս մարմնի ստեղծմանը երկրորդ ընթերցմամբ,- առաջին ընթերցմամբ ՀԱԿ-ը ձեռնպահ է եղել, ՀԱԿ-ից դեմ են եղել միայն Նիկոլ Փաշինյանն ու Հրանտ Բագրատյանը,- երկրորդ ընթերցման ժամանակ Փաշինյանը չի մասնակցել քվեարկությանը, Հրանտ Բագրատյանը ձեռնպահ է քվեարկել: Փոխարենը նախագծին կողմ են քվեարկել Լևոն Զուրաբյանը, Արամ Մանուկյանը, Լյուդմիլա Սարգսյանն ու Գագիկ Ջհանգիրյանը:
«Բոլոր մեր մտահոգությունները, դիտողությունները առաջարկությունները ընդունել են, փոխել են, ոչ թե 100 տոկոս, բայց 95 տոկոս: Կարծում եմ՝ նորմալ օրենք է: Ես հայտարարել եմ, որ կարող ենք անհոգ կողմ քվեարկել»,- ավելի ուշ «Առաջին լրատվական»-ի հետ զրույցում ՀԱԿ քվեարկությունն այսպես բացատրեց Գագիկ Ջհանգիրյանը: Ուշագրավ է, որ ընդդիմադիր քառյակի անդամ ԲՀԿ-ն այս անգամ դեմ է քվեարկել Քննչական կոմիտեի մասին օրինագծին, մինչդեռ առաջին ընթերցմամբ ձեռնպահ է եղել: ՀՅԴ-ն առաջին ընթերցմամբ քվեարկության ժամանակ ձեռնպահ է եղել, հետո կողմ է քվեարկել, «Ժառանգությունը»՝ նույնպես: Այսպիսով, ընդդիմադիր քառյակի տեսակետները բաժանվել են:
Իսկ ընդդիմադիր ՕԵԿ-ը թերևս իներցիայով շարունակում է կրկնել ՀՀԿ-ի քվեարկությունները:
Ուշագրավ է նաև հետևյալ լրացումը, որ արվել է օրինագծում. չնայած այն հանգամանքին, որ Քննչական կոմիտեի ղեկավարին նշանակում է հանրապետության նախագահը, նախագծի 7-րդ հոդվածը հռչակում է, որ Քննչական կոմիտեն ինքնուրույն է և «Քննչական կոմիտեի ծառայողն իր լիազորություններն իրականացնելիս անկախ է և ենթարկվում է միայն օրենքին… Քննչական կոմիտեի ծառայողի լիազորությունների իրականացմանը միջամտելն արգելվում է»: Ըստ այդմ՝ Քննչական կոմիտեն հանրությանը տեղեկացնում է իր գործունեության մասին՝ ապահովելով նախաքննության գաղտնիությունը, ինչպես նաև պետական և ծառայողական կամ օրենքով պաշտպանվող այլ գաղտնիքների պահպանությունը և յուրաքանչյուր տարի հրապարակում է տեղեկատվություն իր գործունեության մասին:
Օրինագծի նախնական տարբերակում Քննչական կոմիտեի նախագահի և նրա տեղակալների համար առավելագույն տարիքը 65 էր: ՀՀԿ-ական Հովհաննես Սահակյանն առաջարկել է հանրապետության նախագահին ընձեռել հնարավորություն՝ սեփական հայեցողությամբ ևս երկու տարով երկարացնել Քննչական կոմիտեի ղեկավարի պաշտոնավարումը:
Աղվան Հովսեփյանը 61 տարեկան է, 4 տարի հետո նա պետք է թողնի պաշտոնը, եթե նախագահը սեփական հայեցողությամբ չերկարաձգի նրա պաշտոնավարման ժամկետը ևս 2 տարով: Իսկ սա նշանակում է, որ օրենքով անկախ հռչակված Քննչական կոմիտեի ղեկավարը պետք է փորձի ամեն կերպ նախագահի սրտով գնալ, որ կարողանա երկու տարի լրացուցիչ ղեկավարել կառույցը: Ընդ որում՝ դրա համար Աղվան Հովսեփյանը պետք է հաջողացնի ոչ միայն Սերժ Սարգսյանի սրտով գնալ, այլև Հայաստանի ապագա նախագահի:
