Ռուսական ВЗГЛЯД թերթի փոխանցմամբ՝ Վրաստանի խորհրդարանի հանձնաժողովներն այս շաբաթ կդիտարկեն կառավարության ներկայացրած՝ 2013 թվականի պետբյուջեի նախագիծը: Վերջինիս համաձայն՝ նախագահ Միխեիլ Սաակաշվիլիի պահուստային հիմնադրամը կրճատվում է 5 անգամ և կազմում է 10 միլիոն լարի (մոտ 6 միլիոն դոլար):
Այս մասին հայտարարել է Վրաստանի ֆինանսների նախարարությունը: Կառավարության համանման հիմնադրամը մնում է անփոփոխ՝ 50 միլիոն լարի: Կրճատվում է նախագահի աշխատակազմի ֆինանսավորումը: Պլանավորված 14,140,000 լարիի (8.5 միլիոն դոլար) փոխարեն հատկացվելու է 5.5 միլիոն դոլար:
Ինչ վերաբերում է Վրաստանի Ազգային անվտանգության խորհրդի պահպանման ծախսերին, ապա դրանց հատկացվել է 1.8 միլիոն լարի (1.09 միլիոն դոլար), մինչդեռ Վրաստանի նախկին իշխանությունները պլանավորել էին 2013 թվականին այդ նպատակով հատկացնել 24,784,000 լարի (14.5 միլիոն դոլար):
