Թուրքական Zaman թերթի փոխանցմամբ՝ Թուրքիայի վարչապետ Ռեջեփ Էրդողանը Քըզըլջահամամում տեղի ունեցած երկօրյա կուսակցական ժողովի ժամանակ առաջ է քաշել մահապատժի վերականգնման հարցը՝ ի պատասխան Իմրալը կղզում ցմահ ազատազրկում կրող քուրդ առաջնորդ Աբդուլլահ Օջալանին տնային կալանք տալու վերաբերյալ քրդամետ «Խաղաղություն և ժողովրդավարություն» կուսակցության (ԽԺԿ) պատգամավորների ու բանտերում հացադուլ հայտարարած հարյուրավոր քրդերի պնդումների:
Էրդողանը հիշեցրել է, որ Օջալանի ձերբակալման ժամանակ (1999) վճռվեց նրան մահապատժի ենթարկել, սակայն որոշ ուժերի ճնշումների հետևանքով դա փոխարինվեց ցմահ ազատազրկմամբ: Օջալանի մահապատժի չիրագործումը հիշատակելիս Էրդողանը գործածել է «դժբախտաբար» բառը: Դրա հետ մեկտեղ Էրդողանն ընդգծել է, որ թուրք հասարակության մեծ մասը հանդես է գալիս մահապատժի վերականգնման օգտին:
Վերլուծաբաններն Էրդողանի այս խոսքերը որակել են որպես այն բանի ցուցիչ, թե իշխող «Արդարություն և զարգացում» կուսակցության (ԱԶԿ) կառավարությունը ցույց է տալիս, որ Թուրքիան թույլ չի տա հացադուլն օգտագործել որպես քաղաքական գործիք:
Հիշեցնենք, որ Օջալանը ձերբակալվեց 1999 թվականի փետրվարի 15-ին Քենիայի մայրաքաղաք Նայրոբիում, իսկ հունիսի 29-ին Թուրքիայի քրեական օրենսգրքի 125-րդ հոդվածով «հայրենիքի դավաճանության» մեղադրանքով դատապարտվեց մահվան:
Դա բողոքի մեծ ալիք բարձրացրեց քրդերի շրջանում և ԵՄ-ում, ինչի արդյունքում Թուրքիայի Վճռաբեկ դատարանը 1999 թվականի նոյեմբերի 25-ին բեկանեց այդ վճիռը՝ այն փոխարինելով ցմահ ազատազրկմամբ։
2010 թվականի ամռանը Թուրքիայի արդարադատության նախկին նախարար Հիքմեթ Սամի Թուրքը բացահայտեց, թե ժամանակին ինչու թուրքական իշխանությունները մահապատժի չենթարկեցին ներկայումս Մարմարա ծովի Իմրալը կղզում ցմահ բանտարկված Աբդուլլահ Օջալանին.
«Այն ժամանակ Օջալանի հետ միասին պետք է մահապատժի ենթարկեին ևս 60 հոգու։ Եթե միանգամից 60 հոգու կախաղան հանեինք, ապա ԵՄ-ին անդամակցել հավակնող Թուրքիան կդառնար կախաղանների երկիր, ուստի հրաժարվեցինք մահապատժի գաղափարից»: