ԱՄՆ-ում նախագահական ընտրությունները պաշտոնապես մեկնարկել են: Առաջին ընտրատեղամասերը բացվել են Նյու Հեմփշիր նահանգի Դիքսվել Նոչ և Հարթս Լոքեյշն փոքր քաղաքներում: 1948 թվականից պահպանվող ավանդույթի համաձայն՝ այդ քաղաքների բնակիչները, որոնց ընդհանուր թիվը 47-ն է, հնարավորություն ունեն երկրում քվեարկել բոլորից շուտ՝ տեղի ժամանակով կեսգիշերն անց (Երևանի ժամանակով ժամը 9:00-ին):
Ընտրությունների վաղ մեկնարկը, առաջին հերթին, ունի գովազդային նշանակություն. այն նպատակ ունի ուշադրություն հրավիրել տեղի հյուրանոցների վրա, որտեղ անցկացվում է քվեարկությունը: Ինչպես ընդգծում են քաղաքագետները, ոչ ոք լուրջ չի ընդունում այդ քաղաքների քվեարկության արդյունքները:
Վերը նշված երկու քաղաքներից հետո ԱՄՆ-ի արևելյան ափի ժամանակով ժամը 06:00-ին (Երևանի ժամանակով ժամը 15:00-ին) քվեարկությունը կսկսվի Նյու Հեմփշիրի մյուս ընտրատեղամասերում, Նյու Յորքում, Նյու Ջերսիում, Վիրջինիայում, Ինդիանայում, Մեյնում, Կոննեկտիկուտում, հաղորդում է ITAR-TASS-ը:
Այնուհետև կես ժամ անց ընտրատեղամասերն իրենց դռները կբացեն Հյուսիսային Կարոլիանայում, Օհայոյում և մյուս բոլոր նահանգներում՝ արևելքից արևմուտք:
Յուրաքանչյուր ընտրատեղամասի աշխատաժամերը կարգավորվում են կոնկրետ նահանգների օրենքներով:
Առաջինը քվեարկությունն ավարտում են Ինդիանա և Կոննեկտիկուտ նահանգները՝ 18:00 (չորեքշաբթի՝ Երևանի ժամանակով ժամը 03.00-ին): Ամենավերջինը կփակվեն Ալյասկայի ընտրատեղամասերը:
Նախագահական ընտրապայքարի ելքը մնում է միանգամայն անկանխատեսելի: Դեմոկրատ Բարաք Օբաման և հանրապետական Միթ Ռոմնին ունեն հաղթանակի հավասար հնարավորություններ:
