Հունիսի մեկին պատրաստ կլինի Հայաստանի՝ Եվրասիական միությանն անդամագրվելու փաստաթուղթը: Հայաստանն այդ միությանը ստիպված է անդամագրվել առանց Լեռնային Ղարաբաղի: Այդ հարցը նույնիսկ չի էլ քննարկվում:
Նման ուշագրավ հայտարարություն այսօր Մինսկ-Երևան-Աստանա-Մոսկվա տեսակամրջի ընթացքում հայտարարեց Եվրասիական տնտեսական հանձնաժողովի Զարգացման և ինտեգրացիայի դեպարտամենտի Միջազգային գործակցության բաժնի պետ Անտոն Ազարովը:
Նա ընդգծեց, որ Մաքսային միությանը կամ մեր՝ որևէ միությանը անդամակցելիս Լեռնային Ղարաբաղի Հանրապետության անդամակցության հարցն անգամ չի էլ քննարկվում․«Սահմաններն անցնելու են Հայաստանի ներկայումս ընդունված սահմաններով»,- ասաց նա:
«Առաջին լրատվական»-ի հետ զրույցում Լեռնային Ղարաբաղի արտաքին գործերի նախարարության խոսնակ Արմեն Սարգսյանն ասաց, որ ԼՂ նախագահ Բակո Սահակյանը այս խնդրի հետ կապված խոսել է դեռևս նախորդ տարի:
Բակո Սահակյանը ողջունել էր Հայաստանի՝ Մաքսային միությանն անդամագրվելու որոշումը: Բակո Սահակյանը հայտարարել էր նաև, որ Լեռնային Ղարաբաղը չի կարող մտնել Մաքսային միություն՝ հաշվի առնելով չճանաչված լինելու կարգավիճակը:
Ինչ վեաբերում է այն հանգամանքին, որ Հայաստանի՝ Եվրասիական տնտեսական միությանն անդամագրվելով անցակետ է դրվում Հայաստանի ու Լեռնային Ղարաբաղի միջև, շավի առնելով Ազարովի այն հայտարարությունը, որ սահմաններն անցնելու են Հայաստանի Հանրապետությունում ներկայումս ընդունված սահմաններով, ապա ԼՂ նախագահ Բակո Սահակյանի խոսնակ Դավիթ Բաբայանը «Առաջին լրատվական»-ի հետ զրույցում այլ կարծիք հայտնեց․ «Պարզ է, որ Արցախը այդ միություն չի մտնելու, մենք չենք դիմել, հետո կարգավորման հետ կապված խնդիրներ կան: Բայց ինչ վերաբերում է սահմանին, ապա չեմ կարծում, թե ինչ-որ փոփոխություններ են լինելու, ամենևին: Հաշվի առնելով Հայաստանի և Արցախի ինտեգրացիոն բարձր աստիճանը՝ անհնար է մաքսակետ դնել»:
Հարցին, թե բացառո՞ւմ է Հայաստանի և Արցախի միջև մաքսակետ դնելը, չնայած ռուս պաշտոնյայի հայտարարությանը, Դավիթ Բաբայանն ասաց․ «Իմ կարծիքով՝ այո, հնարավոր չէ: Հայաստանի և Ղարաբաղի միջև պատերազմական և հետպատերազմյան տարիներին եղել է, բայց ես չեմ կարծում՝ հիմա լինեն այդպիսի անցկատեր»:
ՌԱՀՀԿ տնօրեն Մանվել Սարգսյանը «Առաջին լրատվական»-ի հետ զրույցում ասաց, որ առայժմ անորոշ հայտարարություններ են արվում, և տարօրինակ է, թե ինչու են խոսում հիմա Հայաստանի՝ Եվրասիական տնտեսական և ոչ Մաքսային միությանն անդամագրվելու մասին․ «Մենք կարող ենք Արցախի խնդիրների մասին խոսել այն ժամանակ, երբ դա ամրագրված լինի փաստաթղթում, այսինքն՝ փաստաթղթում ամրագրված լինի, որ Հայաստանն անդամագրվելով Եվրասիական տնտեսական միությանը՝ ստիպված է մաքսակետ դնել Արցախի և Հայաստանի միջև»,-ասաց Սարգսյանը:
Նա ընդգծեց, որ իսկապես առայժմ անհայտ է՝ ինչ են փորձում անել և ինչու այդ խնդիրը հստակ ամրագրված չէ՝ եթե կա նման բան․«Кот в мешке», այլ բան ասել չեմ կարող: Գուցե իրենց մոտ Մաքսային միության հարցը չի ստացվել և մի բան են հորինել Հայաստանին ներքաշելու մասին»:
Հետաքրքրվեցինք նաև, թե հնարավո՞ր է առանց Մաքսային միությանն անդամագրվելու՝ Հայաստանին ստիպեն անդամագրվել միանգամից Եվրասիական տնտեսական միությանը, Մանվել Սարգսյանն ասաց․ «Ես հենց այդ պատճառով էլ ասում եմ՝ «Кот в мешке», կարող է այդ փաստաթուղթը ոչ մի բան է, շաբաթը երկու անգամ ժողով անելու սեղան, ոչ մի բան չի ասվում, խաղ է»:
Լուսանկարը՝ PanARMENIAN Photo-ի
