ՌԴ ԱԳ նախարար Սերգեյ Լավրովը եգիպտական «Ալ-Ահրամ» թերթի հետ հարցազրույցում հայտարարել է, որ Ռուսաստանը Սիրիա է մատակարարում միայն պաշտպանողական սպառազինություն, և որ ներկայում ավարտվում է Հակաօդային պաշտպանության միջոցների մատակարարման պարտավորությունների կատարումը:
Լավրովի խոսքով՝ ռուս-սիրիական ռազմա-տեխնիկական համագործակցությունը մշտապես ուղղված է եղել հնարավոր արտաքին սպառնալիքի դեմ Սիրիայի պաշտպանունակության ամրապնդմանը, այլ ոչ թե Բաշար Ասադին աջակցելուն:
«Հիմնական սպառազինությունը Սիրիայի արաբական հանրապետություն է մատակարվել դեռևս Խորհրդային միության կողմից: Ներկայում մենք ավարտում ենք նախկինում մեր վրա վերցրած պարտավորությունները՝ կապված հիմնականում ՀՕՊ որոշ միջոցների մատակարարման հետ: Նման սպառազինության արտահանումը կրում է պաշտպանողական բնույթ և չի հակասում միջազգային ոչ մի կոնվենցիայի»,-ասել է Լավրովը:
Բացի այդ՝ ՌԴ արտգործնախարարը հավելել է, որ Մոսկվան չի աջակցում Սիրիայում հակամարտող ոչ մի կողմի և դատապարտում է միջազգային հումանիտար իրավունքի ցանկացած խախտում, այդ թվում՝ ռեժիմի կողմից թույլ տված:
Նախարարի խոսքով՝ շատ ուրիշ արտաքին խաղացողներ աջակցում են զինված ընդդիմությանն ու նույնիսկ արդարացնում են նրանց կողմից իրականացված ահաբեկչությունները:
Ռուսաստանը, ի տարբերություն շատ ուրիշ միջազգային և տարածաշրջանային խաղացողների, կապ է պահպանում ինչպես Սիրիայի կառավարության, այնպես էլ ընդդիմադիր ուժերի լայն շրջանակի հետ՝ ասել է Լավրովը:
Նա հայտարարել է, որ որոշ երկրներ խախտում են միջազգային իրավունքի սկզբունքները, որոնք արգելում են այլ պետության ռեժիմի բռնի տապալմանն աջակցելն ու ֆինանսական օգնություն տրամադրելը: 1970 թվականին ՄԱԿ-ի Գլխավոր Ասամբլեայի ընդունած Միջազգային իրավունքի սկզբունքների հռչակագրում նշվում է, որ ոչ մի պետություն չպետք է կազմակերպի, աջակցի, ֆինանսավորի զինված գործողութուններ՝ ուղղված այլ պետության ռեժիմի բռնի տապալմանը:
