Օրեր առաջ Մարդու իրավունքների պաշտպանի գրասենյակը ՄԻԱՎ-ով հիվանդ հնգամյա երեխային խնամքով և սնունդով ապահովելու խնդրանք-կոչով էր հանդես եկել։ ՄԻՊ Կարեն Անդրեասյանը նշել էր, որ պահանջում են բոլոր համապատասխան պետական կառույցների շուտափույթ միջամտությունը, ինչպես նաև խնդրում բոլոր բարեսեր կազմակերպություններին և անհատներին հնարավոր աջակցություն տրամադրել դժվարին պայմաններում հայտնված փոքրիկին օգնելու համար:
ՄԻՊ-ի գրասենյակ օգնության արձագանքները չուշացան: «Առաջին լրատվական»-ի հետ զրույցում ՄԻՊ Կարեն Անդրեասյանն ասաց, որ բարեսեր կազմակերպությունների և մարդկանց արձագանքները սկսվել են հայտարարությունից անմիջապես հետո և շարունակվում մինչ այսօր: Ըստ Կ. Անդրեասյանի՝ ՄԻԱՎ-ով հիվանդ հնգամյա երեխային օգնություն ցուցաբերելու նպատակով արձագանքներ են եղել ոչ միայն մեր համաքաղաքացիներից, այլև ՌԴ-ից և այլ երկրներից:
«Քանի որ մենք չենք կարող ինքներս նյութական գործընթացն ապահովել, փնտրում ենք այն հասարակական կազմակերպությունների հետ ելքեր, որոնք այդ ոլորտում աշխատում են, որպեսզի բարերարներն այդ կազմակերպությունների միջոցով կարողանան օգնությունը տեղ հասցնել և ապահովել երեխայի խնամքը, իսկ մենք հետևենք, որ այդ գործընթացում ամեն ինչ արդար ու ճիշտ է արվի: Այսինքն՝ հիմա հասարակական կազմակերպություններից 1-2-ը կզբաղվեն խնամքով, իսկ ենթակա միջոցները կտրամադրեն այն քաղաքացիները, որոնք մինչև հիմա զանգահարում են մեր թեժ գծին»,- մանրամասնեց Կարեն Անդրեասյանը՝ շարունակելով, որ այս դեպքը ցույց տվեց, որ պետությունը պետք է հապճեպ միջոցներ ձեռնարկի, որպեսզի ստեղծվեն պայմաններ այլևս նման հարցերի առջև չկանգնելու և առանձին անհատների, բարեգործությամբ առաջացած խնդիրը չլուծելու համար:
Մարդու իրավունքների պաշտպան Կարեն Անդրեասյանը վստահեցրեց, որ այս հարցում հետևողական կլինեն: Նա նաև տեղեկացրեց, որ կա Սոցապնախարարության համապատասխան պաշտոնյա, ով աշխատում է ՄԻՊ-ի հետ և` ոչ միայն այս դեպքով: Սակայն ցավով նկատեց, որը լուծումը չունեն: Ըստ Անդրեասյանի՝ սա բացառիկ դեպքերից է, երբ չկա մշակված լուծում: «Պետք է, թերևս, մտածել, թե ինչ պետք է անել այն դեպքերում, երբ ծնողներն անհանգստանում են, որ ՄԻԱՎ-ով ապրող երեխան միանա իրենց երեխաներին, իսկ հատուկ մի վայր չկա, որտեղ ապահովվի այս երեխաների խնամքը»,- ասաց Կարեն Անդրեասյանը:
Հարցին, թե այս փուլում ի՞նչ օգնություն է տրամադրվել ՄԻԱՎ-ով տառապող փոքրիկին՝ պատասխանեց, որ առաջինը եղել է ՄԻՊ-ի աշխատակիցների, տարբեր կազմակերպությունների միջոցով օգնությունը: «Տրվել է հագուստ, որոշակի պայմաններ, նյութական որոշակի աջակցություն, բայց հիմա աշխատում ենք սիստեմատիկ ամենօրյա խնամքն ապահովելու նպատակով: Քաղաքապետարանից առաջարկ եղավ, որ մայրն աշխատի կանաչապատման աշխատանքների ոլորտում, բայց մայրը չի կարողանա աշխատել, որովհետև երեխային խնամող չկա: Հիմա փորձում ենք այդ հարցը լուծել, որպեսզի մայրը կարողանա աշխատել՝ դադարեցնելով մուրացկանությամբ զբաղվելը»,- եզրափակեց իր խոսքը ՄԻՊ Կարեն Անդրեասյանը:
Հիշեցնենք, որ չունենալով ապրուստի նվազագույն միջոցներ՝ երեխայի մայրը գումար է վաստակում մուրացկանությամբ՝ ներքաշելով երեխային նման կենսակերպի մեջ։ Իսկ երեխան, բացի ՄԻԱՎ հիվանդությունից, ունի մի շարք այլ հիվանդություններ, ինչպիսիք են՝ մտավոր հետամնացություն, մանկական ուղեղային կաթված և մաշկային հիվանդություն:
