ԱՄՆ Կալիֆոռնիա նահանգի խորհրդարանը ձայների ճնշող մեծամասնությամբ` 70 կողմ և մեկ դեմ հարաբերակցությամբ, ընդունել է Արցախի Հանրապետության անկախությունը ճանաչող բանաձև: «Կալիֆոռնիա Կուրիեր» թերթի հրատարակիչ և խմբագիր Հարութ Սասունյանն «Առաջին լրատվական»-ի հետ զրույցում համոզմունք հայտնեց, որ Սպիտակ տունը որևէ կապ չունի այս որոշման հետ, դա Կալիֆոռնիա նահանգի ինքնուրույն որոշումն է:
Հարցին` արդյոք կապ տեսնո՞ւմ է ԵԱՀԿ Մինսկի խմբի ամերիկացի համանախագահ Ջեյմս Ուորլիքի հայտարարության և այս բանաձևի ընդունման միջև, Սասունյանը պատասխանեց. «Ոչ, ոչ մի կապ չունի: Մի ադրբեջանցի թղթակից Ուորլիքին հարցրեց` ի՞նչ է կարծիքդ, նա ասաց, որ Կալիֆոռնիա նահանգն ինքնուրույն է և ինքնուրույն որոշում է կայացրել:
Անշուշտ, սա ջախջախիչ հաղթանակ էր: Ուրիշ տեղ այսքան հայ չկա, այսքան ուժեղ և կազմակերպված չեն: Սա արդեն հինգերորդ նահանգն է, ուրիշ չորս նահանգներում ևս նման որոշում է ընդունված»: Սասունյանի խոսքով` ազերիները եկան և լոբբի արեցին, բավական ուժեղ լոբբիստներ ունեն, բայց իրենց միլիոնները ծախսեցին, դրա դիմաց ստացան ընդամենը մեկ քվե, իսկ հայկական կողմը, առանց մի կոպեկ ծախսելու, 70 քվե ստացավ:
«Ուրախ եմ, որ մենք օգնում ենք նրանց, որ իրենց պետության միլիոնները վատնեն այդպես: Իմ կարծիքով, սակայն, պետք չէ չափազանցել` «պատմական» համարելով այս որոշումը, քանի որ արդեն չորս նահանգ ընդունել է նման որոշում, բացի դրանից՝ որոշումը դեռ ընթացքի մեջ է: Կալիֆոռնիա նահանգը երկու ներկայացուցչական տուն ունի, մեկը Ներկայացուցիչների տունն է, մյուսը` Սենատը: Դեռևս վաղ է, որ շատ խանդավառվենք ու պատմական հաղթանակ կոչենք: Պետք է սպասենք, որ այն նաև Սենատում անցնի, դրանից հետո կուրախանանք»,- ասաց նա:
ԱՄՆ երիտասարդ հայերի միավորման ներկայացուցիչ Հարություն Հարթունյանը տեսակետ հայտնեց, որ սա բավական կարևոր իրադարձություն է բոլորիս համար: Այն, որ Կալիֆոռնիայի նահանգն է ճանաչում արդեն, մեծ նշանակություն ունի մյուս նահանգների համար ևս, ուստի նահանգային մասշտաբով սա մեզ համար ամենակարևոր քայլն էր:
«Մենք ուզում ենք տեսնել, որ մնացած նահանգները նույն բանը շարունակում են, կարծում եմ` սա բավական կարևոր է եղել մեր համայնքի համար: Ըստ իս` Կալիֆոռնիան ինքնուրույն պետք է հարցեր լուծի, բայց պետք է մեծ ազդեցություն թողնի Սպիտակ տան որոշումների վրա ևս: Յուրաքանչյուր նման քայլ, կարծում եմ, փոքր-ինչ առաջ գնալ է, և սա կարևորագույն հաղթանակներից մեկն է»,- ասաց նա` հավելելով, որ իրենք փոփոխություններ են տեսնում ԱՄՆ դիրքորոշման մեջ ամենատարբեր հարցերի շուրջ:
Հարթունյանի համոզմամբ` հայկական գործոնն էլ մեծ ակտիվություն է ցույց տալիս, ընդ որում` այդ գործոնը բավական կարևոր է հենց Կալիֆոռնիայի ներսում: Թեև ադրբեջանական լոբբին էլ աշխատանք է տանում տարբեր նահանգներում, բայց այստեղ, ըստ Հարթունյանի, իրենց ուժն այս անգամ փաստեց` ադրբեջանական միլիոնավոր նավթադոլարները չեն կարողանում մրցակցել հայկական գործոնի և քաղաքական գործիչների` արդեն ճիշտ մոտեցման գալու հետ:
