Արմատական իսլամիստական խմբերի հարյուրավոր ներկայացուցիչներ ուրբաթ օրը Կահիրեի կենտրոնում ցույցի են ելել` Եգիպտոսում շարիաթի նորմերի (իսլամական օրենք) պահպանման պահանջով, հայտնում է տեղական «Ալ-Ահրամ» թերթը:
«Ժողովուրդը պահանջում է հետևել շարիաթին: Խնդիրների լուծումն իսլամն է»,- բացականչում են ցույցի մասնակիցները, որոնցից շատերը ձեռքներին տանում են Եգիպտոսի դրոշը:
Հրապարակ են եկել մոտ 22 իսլամական շարժումների ներկայացուցիչներ, մասնավորապես` «Թուլլաբ աշ-Շաիրա» և «Աիդուն աշ-Շաիրա» խմբավորումների անդամները, նշում է հրատարակությունը: Մինչ Թահրիր հրապարակում հավաքվելը նրանք երթով անցել են Կահիրեի կենտրոնական փողոցներից մեկով:
Արմատական իսլամիստները պնդում են, որ չկա «շարիաթի սկզբունքներ» հասկացություն, և ուզում են հասնել նրան, որ շարիաթը սահմանադրորեն հաստատվի որպես Եգիպտոսի օրենսդրական հիմք:
