Մարդու իրավունքների պաշտպան Լալա Ասլիկյանը նոյեմբերի 1-ին տարածել է հաղորդագրություն, որում ասվում է, որ ի պատասխան արդարադատության նախարար Հրայր Թովմասյանի հայտնի ելույթի՝ նոյեմբերի 2-ին, ժ. 12:00–ին ՀՀ արդարադատության նախարարության շենքի առջև տեղի կունենա կարուձևի դասընթաց՝ նախարարի համար:
Հիշեցնենք, որ Հրայր Թովմասյանը լրագրողների հետ ճեպազրույցում ասել էր, որ ՀՀ արդարադատության նախարարությունը երբեք չի իրականացրել քրեակատարողական համակարգում եղած խնդիրները թաքցնելու մարտավարություն, ապա ավելացրել էր, որ «աչքն ու բերանը կարելը դատապարտյալների համար այնքան սովորական է, ինչքան աղջիկների մոտ ականջօղեր կախելը»
Նախարարն այսպես էր արձագանքել վերջերս քրեակատարողական հիմնարկներում տեղի ունեցած նմանատիպ դեպքերի մասին լրագրողների հարցերին։ Ավելին, Հ. Թովմասյանը դատապարտյալի կողմից ճկույթը կտրելու կամ բերանը կարելու դեպքերը որակել էր «սովորական»։